Pagpahigayon sa Flores de Mayo ipadayon sa simbahan

CEBU, Philippines — Ang tradisyonal nga Flores de Mayo sulod sa tibuok buwan sa Mayo padayon gihapon bisan nagpatuman ang mga simbahan sa Missa Sine Populo human ang Sugbo ubos pa gihapon sa enhanced community quarantine.

Matud ni Padre Moenil Lapa, kura paruko sa Parroquia de Virgen Remedios Parish sa Barangay Guindarohan, Lungsod sa Minglanilla nga dako kaayo ug kalahian ang Flores de Mayo karon tungod kay Missa Sine Populo man ang gihimo diin pipila ra sila ang mohimo sa Santos nga Misa ug walay bagang duot sa katawhan sama sa naandan nga daghan kaayong kabataan.

Matud ni Lapa nga Lunes sa hapon magsugod na sila sa kalihukan sa Flores de Mayo.

Ang maong Flores de Mayo alang kaniya usa ka oportunidad ug challenge tungod kay kung naay piso-piso ang mga batan-on unahaon o mas palabihon siguro ang mobile legend o tiktok apan sila sa parokya aduna sila’y online catechesis ug Flores de Mayo.

Si Lapa nagkanayon nga angay gihapon nga ipadayon ang Flores de Mayo aron padayon ang debosyon ug ang pagpanalipd ug pag-agak sa Mahal nga Birhen sa tanang katawhan ug mao kini ang mga pamaagi sa padayon nga pagdasig sa katawhan sa pagpakabuhi bisan sa hulga sa covid-19

Samtang si Padre Jestoni Del Castillo sa Academia de San Martin sa Lungsod sa Daanbantayan nibutyag nga sa ilang parokya sa Sta. Rosa De Lima maoy usa sa mga nihimo sa live streaming sa Flores de Mayo.

Matud ni Del Castillo nga ang mga hagit nga ilang giatubang karon moa nga gamay nalang ang makatambong sa Flores de Mayo tungod kay pipila ra man ka mga parokyano ang adunay gadget. /BDB (BANATNEWS)