109 positibo sa Barangay Suba

CEBU, Philippines — Miabot og 124 ka mga bag-ong positibo sa coronavirus (COVID-19) ang natala sa Sugbo kagahapong adlawa, Mayo 2.

Kini maoy gipahibalo sa online press briefing kagahapong adlawa ni Cebu Governor Gwendolyn Garcia. Ang upat niini mga Overseas Filipino Workers nga kauban sa 185 ka OFWs nga nangabot sa Sugbo niadtong nakalabay nga Martes, Abril 28, base kini sa datus sa Department of Health Region-7.

Si Garcia midugang nga daan nga dunay 14 ka mga OFWs ang nigawas nga positive sa virus niadtong Biyernes, Mayo 1, ug karon nahimo na tanang 18.

Wala hinuon ibutyag ni Garcia kun taga asa ang maong mga OFWs aron matud niya dili na magkaguliyang ang nagkadaiyang local government units diin sila nagpuyo ug makamugna hinuon og panic ug  kahadlok sa mga taga didto.

Wa makauli

Subli niyang giklaro nga pagabot sa maong mga OFWs niadtong Martes, gidiretso sila og sulod sa mga hotels sa Cebu City aron i-quarantine og 14 ka adlaw  ug walay bisan usa kanila ang gitugotang makagawas o makapauli sa ilang mga lungsod.

“Dili na lang nato i-identify ug asa ni sila gikan aron dili magubot ang mga residences ug ang mga LGUs,” matud niya.

Didto sa mga hotels gipaubos sila og test ug kadtong nagpositibo gibuwag dayon sa uban.

Gawas sa maong upat ka OFWs, dunay 119 nga bag-ong nagpositibo sa Cebu City ug usa sa Mandaue City. Sumala pa nga ang maong us aka bag-ong kaso sa Mandaue City, inmate sa Mandaue City Jail apan nakabsan sa kinabuhi niadto pang Biyernes.

Contact tracing

Sa pagkakaron, si Garcia miingon nga nagpadayon ang contact-tracing and swabbing operations sa lalawigan.

Gipaubos sa nasal pharyngeal ug oral pharyngeal swabs na ang 39 ka tawo sa City of Carcar, 70 sa Bantayan, ug 12 sa Daanbantayan.  Tulo sa Minglanilla samtang 12 pa ang gikatakdang ipaubos sa maong test. Duna say unom ka tawo sa Catmon nga gikatakdang ipaubos sa swabbing.

Gibutyag sab ni Garcia nga kadaghanan sa mga nagpositibo pulos asymptomatic.

“A number of them are asymptomatic, wala’y gipakita na symptoms. Na swab lang ni tungod kay they came in contact with a positive case ug ang uban sad nag-manifest og hilanat ug karon nawala na,” matud niya.

Gipanawagan ni Garcia ang tanang city ug municipal health officers nga suportahan ang immune systems sa mga pasyente gamit ang mga nasuwayan na ug epektibong mga pamaagi sama sa pagtuob ug pag-inom og salabat.

109 sa Suba

Sa pikas bahin, dinhi sa Cebu City nga adunay natalang 119 ka bag-ong positibong kaso sa COVID-19 kagahapon, ang 109 niini gikan tanan sa Barangay Suba.

Sila mga molupyo sa Abellana St., General Gines, Belgium St., Magsaysay St., ug Sto. Niño St.

Samtang ang ubang bag-ong mga kaso gikan sa Centro Mambaling  (walo); Lusimba, Pardo (usa); ug Upper Bacayan (usa).

Ang kinatibuk-ang ihap sa mga kaso sa dakbayan 879 na ug pito na ang namatay.

Ang Cebu City Jail maoy adunay labing daghang kaso nga 333, samtang ang Barangay Luz ikaduha (193).

Duna na karoy 29 ka mga barangay sa dakbayan ang naigo sa COVID-19 gikan sa 80 ka mga barangay niini.

Gipahibalo sab ni Mayor Edgardo Labella nga sugod sa Mayo 2, ang Pasil Fish Port “closed indefinitely” aron malikayan ang dugang nga pagkaylap sa virus.

Ang maong fishport ubos sa hurisdiksyon sa Barangay Suba.

“The closure will give way to the massive disinfection, contact tracing and covid-19 testing activities of the Cebu City Government in the area. We ask for your support and understanding as we unite to fight this invisible enemy,” mabasa sa post. Lorraine Ecarma The Freeman/IBM