Mga negosyante sa Mandaue tinguhang mahatagan og insintibo

CEBU, Philippines — Gitinguha karon sa kagamhanan sa Dakbayan sa Mandaue ang paghatag og insentibo sa mga magpapatigayon nga naapektohan tungod sa paghunong sa ilang trabaho dihang gipatuman ang enhanced community quarantine isip paagi sa kagamhanan sa paglikay sa pagkuyanap sa coronavirus disease (COVID-19) nga nagsugod niadtong Marso 29, 2020.

Si Konsehal Carmelito Delmar Jr. nangamahan og resolusyon nga nagsilbing economic relief sa mga magpapatigayon sa maong dakbayan.

Matud ni Delmar nga tungod sa temporaryo nga paghunong sa operasyon sa mga magpapatigayon sa tagsa-tagsa nila ka mga establisamento ilang nakita usab ang dako niining epekto nga ang pipila kanila nitaktak sa ilang mga trabahante.

Si Delmar nagkanayon nga sa maong kahimtang sa mga magpapatigayon nagkinahanglan usab nga ang kagamhanan mosabot kanila pinaagi sa paglugway sa ilang quarterly nga balayranan sa ilang business tax ug realty tax ug dili na angayng sundon ang gitakda nga deadline.

Ang maong resolusyon ni Delmar napasar kini sa first reading sa niaging regular session sa konseho ug gilauman nga mapasar kini sa second ug final reading. /BDB (BANATNEWS)