Labella: Hinabang ipaagi na sa barangay
CEBU, Philippines — Ang ikaduhang hugna sa pag-apod-apod og ayuda sa kagamhanan sa Dakbayan sa Sugbo ipaagi na sa mga opisyal sa barangay.
Kini ang gitug-an ni Mayor Edgardo Labella atol sa KBP Marathon on Covid-19 nga gipalanog sa 20 ka mga radio station nga sakop sa Kapisanan ng mga Broadcaster ng Pilipinas Cebu Chapter.
Matud ni Labella nga atol sa unang hugna sa pag-apod-apod tinguha unta ang panaghiusa sa Mayors Information Liason Officer (MILO) ug barangay officials sa pagpanghatag adunay gamay nga wala pagsinabtanay.
Ug tungod kay aduna may extension sa enhanced community quarantine (ECQ) hinungdan nga mohatag na usab sila og ayuda alang sa ikaduhang hugna ngadto sa mga “poorest of the poor” ug “lower class to middle class”.
Si Labella nagkanayon nga atol sa pag-apod-apod unya sa ikaduhang hugna sa ayuda posibleng 10 kilos ngadto sa 15 kilos na lang nga bugas aron daghan ang mahatagan.
Si Labella uban sa crisis committee nagtan-aw usab sa mga panginahanglanon sa katawhan sa dakbayan. /BDB (BANATNEWS)
- Latest
