Kadaugan sa Mactan gisaulog sa mga opisyal

CEBU, Philippines — Bisan sa hulga sa coronavirus 2019 apan giisip gihapon nga malampuson ang simple nga pagsaulog sa Kadaugan sa Mactan 2020 kagahapon sa buntag.

Si Lapu-Lapu City Mayor Mayor Junard “Ahong” Chan ug Bise Mayor Celedonio Sitoy uban sa mga sakop sa konseho sa dakbayan maoy nangulo sa kalihukan uban sa laing mga opisyal sa kagamhanan.

Giobserbar ang tagsa ka metro nga gilay-on samtang nagbarug atubangan sa estatuwa ni Datu Lapu-Lapu alang`sa ilang paghalad og pongpong nga lab-as nga mga buwak.

Nahimo hinuong mingaw ang kasaulogan nga dakung sukwahi sa pagsaulog sa nangaging katuigan nga magdasok ang Oponganon sa alang sa pagsud-ong sa kalihukan.

Gihimo nila ang pagpuli-puli sa paghalad og mga buwak sanglit hugot man nga gipatuman ang protocol nga social distancing sa paglikay sa pagtakboy sa coronavirus disease 2019.

Si Chan nga nagsul-ob sa iyang personal protective equipment (PPE) maoy una nga nihalad sa gidala niyang mga buwak ug gisundan kini ni Sitoy.

Sa nasayran kang Chan nga sa wala pa motumaw ang COVID-19 maoy ilang gihimo ang paghan-ay na sa mga kalihukan sa niaging tuig sanglit kabahin man kini sa pagpangandam sa quincentennial celebration sa Abril 27, 2021.

Naglakip sa ilang gipangandaman mao ang pagdapit og mga artista gikan sa kaulohan alang sa reenactment sa Battle of Mactan. /GMR (BANATNEWS)