Nadawat nga hinabang gipamalit og drugas?
CEBU, Philippines — Usa ka giingong beneficiary sa Unconditional Cash Transfer (UCT) kinsa nakadawat na og hinabang gikan sa gobiyerno ang gisikop sa mga polis human kini nasakmiti og ginadiling drugas niadtong Biyernes sa hapon diha sa Sitio Salvador, Barangay Tanke, Dakbayan sa Talisay.
Si Tomas Eralino Basalo, 55-anyos, ulitawo, taga Barangay Cansojong sa nahisgutang siyudad nitug-an sa kapolisan nga bag-o lang siya nga nakadawat sa UCT.
Si Police Major Gerard Ace Pelare, hepe sa Talisay City Police Station nagkanayon nga nisuway sa pag-agi si Basalo diha sa gihimo nila nga static checkpoint.
Ug dihang gipangutana kini sa iyang mga dokumento nahagbong ang siyam ka gagmay nga paketeng shabu diha sa karsada.
Sa imbestigasyon sa kapolisan giingong ang nadawat nga hinabang ni Basalo mao usab ang gigamit niini og pamalit sa ilegal nga drugas.
Apan ang buhatan sa City Social Welfare and Development (CSWD) nihimakak nga naapil sa listahan si Basalo nga beneficiary sa UCT.
Si Basalo natingkagol karon sa detention cell sa Talisay City Police Station. /BDB (BANATNEWS)
- Latest
