COVID19 update: Cebu City ray dunay positibo
![COVID19 update: Cebu City ray dunay positibo](https://media.philstar.com/photos/2020/04/26/toledo_2020-04-26_01-14-02.jpg)
CEBU, Philippines — Ang Dakbayan sa Sugbo mao ray nakatala og dugang kaso sa coronavirus disease base sa swab test results kagahapong adlawa Abril 25.
Matud ni Gob. Gwendolyn Garcia nga sa 123 ka swab test results kagahapon, 60 ang negatibo ug 63 ang positibo tanan gikan sa Cebu City Jail.
Matud sa gobernador sa mga swabs, siyam niini ang gikan sa Probinsya sa Sugbo, 109 sa Cebu City, tulo sa Lapu-Lapu City ug Mandaue duha ka buok.
Sa pagkakaron matud ni Garcia anaa na sa 455 ang kaso sa covid-19 sa tibuok isla sa Sugbo, kon diin ang Cebu City gihapon ang pinakadaghan nga moabot sa 413, sunod ang Lapu-Lapu nga adunay 28 nga recorded nga kaso, gisundan sa Mandaue nga 11 ug ang Probinsya sa Sugbo nagpabilin nga tulo (3) pa gihapon ang kaso.
Si Garcia niawhag sa mga LGUs ipadayon ang swabbing sa ilang mga lugar samtang ang mga barangay kinahanglan ipadayon ang pag monitor sa mga tawo kanila nga adunat Influenza Like Illnesses (ILI) ug ireport dayon.
Ang mga Persons Under Monitoring sa Probinsya anaa sa 4, 735 samtang ang nahuman na sa 14 ka adlaw nga kwarantina niabot sa 63, 247.
Sa pikas bahin, gipahibalo sa Department of Health nga dunay 102 ka bag-ong natakboyan sa coronavirus disease 2019 (COVID-19) ug miabot na kini tanan karon og 7,294 sa tibuok nasud.
Ang namatay miabot na sab og 494 tungod sa nadugang nga 17 ka mga nakalas kagahapong adlawa. Samtang 30 sab ang mga nangaayo ug nahimo na karong 792.
Moabot na og kapin 2.62 milyones ang mga kaso sa COVID-19 apil na ang dul-an 182 mil nga nakalas sa tibuok kalibotan base sa talaan sa World Health Organization.
Tungod kay layo pa kaayo ang tsansang madiskubrehan ang tambal batok niini, si United Nation Secretary General Antonio Guterres miingon nga kinahanglang magtinabangay ang mga global organizations ug world leaders uban sa pribadong sector aron pagdiskubre sa novel coronavirus vaccine. /IBM
- Latest