COVID19 update: Sitio sa Labangon nag-lockdown
![COVID19 update: Sitio sa Labangon nag-lockdown](https://media.philstar.com/photos/2020/04/20/eg-9034_2020-04-20_00-56-56.jpg)
CEBU, Philippines — Gipaubos og lockdown sugod kagahapong adlawa ang Sitio Callejon, sa Barangay Labangon, Cebu City nunot sa usa ka residente niini nga nagpositibo sa COVID-19.
Dugang duha sab ang nagpositibo sa dakbayan kagahapong adlawa , usa sa Katipunan, Labangon ug usa sa Mambaling. Ang sa Mambaling gidala sa tambalanan apan namatay sa miaging gabii sumala pa ni Mayor Edgardo Labella.
“Amo gi lockdown na sab, karon lang gyud. Naa may positive na report ako nadawat karon ra sad. Wala pa gi lockdown the whole Labangon but for now Sitio Callejon sa,” pagkompirmar pa ni Labangon Brgy. Captain Victor Buendia.
Sa pagkakaron, gibantayan nila og maayo ang pamilya sa maong nagpositibo nga dili sila mogawas sa ilang balay ug makighugoy-hugoy sa mga silingan.
“As of now nakagawas pa ang uban, ang kadto lang immediate family amo gi bantayan og ayo,” dugang pa ni Buendia bahin sa maong sitio nga adunay 200 ngadto sa 300 ka pamilya.
Siya miingon nga mas labing maayong di na paabuton pang tanang sitio dunay matakdan, mas maayo pang i-lockdown ang tibuok barangay.
Sa pikas bahin, 172 ka bag-ong kaso sa COVID-19 ang nadugang sa talaan sa DOH sa tibuok nasud ug nahimo na kini karong 6,259. Dunay 12 nga namatay ug 56 ang nangaayo. Miabot na tanan og 409 ang nakalas ug 572 ang nangaayo Philstar.com/IBM (BANATNEWS)
- Latest