Mga trabahante sa kampo nakadawat og hinabang
CEBU, Philippines — Nangapod-apod ang Central Command sa Armed Forces of the Philippines og food packs sa mga kabus nga pamilya nga walay kinitaan niining panahon nga gipatuman ang Enhance Community Quarantine batok sa Covid-19 pandemic.
Niabot sa 68 ka tawo ang nakadawat sa mga hinabang nga naglangkob sa mga sweepers, tee boys ug errand runners nga nagtabang sa pagmintinar sa Camp amenities nga bukas sa mga sibilyan.
Ang maong mga volunteers bugtong kita nila ang mga tips ug allowance nga ihatag kanila hinungdan nga apektado kaayo sila sa dihang temporaryo nga gisirad-an ang amenities tungod sa ECQ.
Matud ni Lt. Gen Roberto Ancan, commander sa CentCom-AFP, nga ilang responsibilidad ang pag-atiman sa katawhan ilabi na sa ilang mga volunteers nga apektado ang panginabuhian tungod sa pagpatuman sa ECQ.
Sumala pa ni Ancan nga ang ilang pag-apod-apod sa food packs kauban sa mga stakeholders maoy ginagmay nilang tabang ngadto sa mas labing nanginahanglan niining lisud nga panahon tungod sa pandemic.
Gawas sa 68 ka tawo, ang CentCom nakaapod-apod na sab og laing usa ka libo ka food packs sa Cebu International Convention Center (CICC), Sitio Lower Tayong, Brgy. Banilad ug lain-laing sitio sa Barangay Guba ug habal-habal ug mga trisikad drivers sa Barangay Lahug ug Apas sa Dakbayan sa Sugbo. /GMR (BANATNEWS)
- Latest
