COVID19 update: Positibo sa COVID sa Sugbo, 175 na
![COVID19 update: Positibo sa COVID sa Sugbo, 175 na](https://media.philstar.com/photos/2020/04/17/eg-5511_2020-04-17_23-29-01.jpg)
CEBU, Philippines — Sobra na sa usa ka gatos ang kaso sa nataptan og coronavirus COVID-19 sa Sugbo human nadugang ang 84 ka positibo kagahapong adlawa ug kadaghanan sa Sitio Zapatera sa Dakbayan sa Sugbo. Atol sa tigom nga gipatawag ni Gob. Gwendolyn Garcia uban ang mga mayor sa probinsya gitug-an niini nga anaa na sa 175 ang kaso sa tibuok isla sa Sugbo sugod niadtong Marso.
Ang Dakbayan sa Sugbo maoy pinakadaghan og kaso nga niabot na sa 161, lima na niini ang namatay, 13 ang naka-recover.
Ang Dakbayan sa Lapu-Lapu adunay walo (8) sa talaan human napun-an og usa, usa sab ang naka-recover; Mandaue City tulo na ang kaso, duha ang naka-recover na ug ang Probinsya sa Sugbo, tulo (3) ang natala, duha niini ang naayo na ug usa ang namatay.
Si Dr. Jaime Bernadas ang regional director sa Department of Health (DOH-7) nirekomendar og “extensive testing” sa mga lungsod.
“Please intensify samples so at least we have a clearer picture of the country side,” awhag pa ni Bernadas.
Sa Abril 16 nga datus sa Kapitolyo, anaa na sa 58, 126 ang nakahuman na sa 14 ka adlaw nga quarantine satang 3, 265 ang Persons Under Monitoring (PUMs).
Sa pikas bahin, nakatala nasab og pinakadaghang nangaayo sa COVID-19 kagahapong adlawa. Sumala pa sa DOH adunay 52 nga nangaayo kagahapon, mas ubos hinuon kini itandi niadtong Biyernes nga dunay 82 nga nangaayo. Sa pagkakaron 487 na ang wa nay virus sa lawas. Sa kinatibuk-an ang Pilipinas aduna nay 5,878 kompirmadong nataptan human nadugangan kagahapon og 218. Samtang 25 sab ang namatay kagahapon ug miabot na tanan og 387.
Ang Bureau of Jail Management and Penology mipahibalo sab nga siyam ka inmates nila ang nataptan sa virus.
Sa tibuok kalibotan, miabot na og 2.1 million ang nataptan ug kapin 145,000 na ang namatay sa coronavirus pandemic. Philstar.com/IBM (BANATNEWS)
Related video:
- Latest