Mag-amahang langyaw ug Pinay nisukol sa polis

CEBU, Philippines — Usa ka langyaw kinsa nikulata sa iyang kapuyo niadtong Miyerkules sa buntag diha sa Barangay Linao, Dakbayan sa Talisay ang gidakop sa kapolisan sa maong siyudad.

Ang anak usab sa maong langyaw ug ang kapuyo niini gilakip sa pagdakop human kini giingong nisukol sa mga nirespondeng polis dihang dakpon na unta ang ilang amahan.

Base sa report sa kapolisan nga si Stephanie Ganancial, 30-anyos kinsa adunay mga bun-og sa iyang walang bahin sa ngabil ug walang tuhod ang nidangop diha sa buhatan sa kapolisan.

Si Ganancial nitug-an nga gibun-og siya sa iyang kapuyo nga si Brett Dawson Hall, 56-anyos, usa ka American national.

Ang kapolisan daling niresponde sa maong report ug giingong pag-abot nila diha sa lugar ang suspetsado nasuko kini ug gitukmod ug gipatiran ang polis.

Ug tungod niini nahitabo ang komosyon ug nilaban ang anak sa suspetsado nga si Jonathan Cameron Hall, 25-anyos ug ang kapuyo usab niini nga si Rose Papolonias Degamo, 24-anyos.

Ug gumikan usab niini giapil sa pagdakop sa mga polis si Jonathan ug Degamo.

Si Brett mag-atubang kini og tukmang kaso tungod sa iyang pagpamun-og sa iyang kapuyo ug direct assault tungod sa giingong pagsukol usab niini sa kapolisan.

Samtang sila si Jonathan ug Degamo mag-atubang usab og kasong direct assault tungod sa pagsukol usab nila sa mga polis nga niresponde. /BDB (BANATNEWS)