Zafra: Mga ginikanan ipatawag

CEBU, Philippines — Gihangyo ni Cebu City Councilor Phillip Zafra ang publiko nga seryusohon ang pagtuman sa “stay at home order” nga gipatuman samtang nagpadayon ang implimentasyon sa enhanced community quarantine sa siyudad.

Ang panawagan ni Zafra kinsa mao committee chairman on peace and order sa Konseho sa dakbayan, iyang gihimo human adunay mga reports gikan sa lainlaing mga barangay nga ang mga residente wala motuman sa maong kamandoan.

“Well, ato lang gyud gi intensify and we apply it more strictly kay ato man nakita these past days na murag gibalewala lang sa mga tawo and we are under uncertain and extraordinary times,” matud pa ni Zafra.

Mipasidaan si Zafra nga kadtong masakpan sa mga pulis nga naglaroylaroy lang sa kadalanan nga walay importanteng tumong diretso dad-on sa presinto.

Ang mga ginikanan sa mga menor de edad nga masakpan kinahanglang paesplikaron diha sa barangay.

Giingon niya nga base sa mga taho, kadaghanan sa mga nakalapas gikan sa mga remote areas. Ang uban nanggawas aron lang makigtabi sa mga silingan.

“Mao na ato gyud gihangyo ang mga kabarangayan nga sila mismo will do their part, will do their share in observance of the executive orders especially the at stay home policy,” awhag pa ni Zafra. /IBM (BANATNEWS)