Kadaugan sa kahayag

CEBU, Philippines — Karong adlawa Domingo sa Pagkabanhaw us aka selebrasyon sa kadaugan sa kinabuhi batok sa kamatayon. Mao kini ang nag-unang pundasyon sa pagtuong Kristiyano. Ang mga gitudlo ni Kristo ug ang paglansang kaniya sa krus wala untay bili kun wala pay Domingo sa Pagkabanhaw.

Nakita nato ang dili permanente ang tanan sa kalibotan. Mangitngit ang kalibotan sa paglansang kang Kristo sa krus. Apan sa samang higayon, naghatag kini og paglaum nga dunay kahayag sa Iyang pagkabanhaw.

Duna akoy nakat-onan kabahin sa kangitngit. Kini maoy moanunsyo sa pagabot sa kahayag. Nakahinumdom pa ko kaniadto nga pirme kaming mag- “aurora,” o prosisyon sa kaadlawon. Adtong panahona, nakapangutana ko nganong kaadlawon man gyud nga nangatulog paman ang mga tawo.

Dili gyud ko kalimot nga akong Mama Pining mokuyog gyud aning “aurora” kanunay. Kasagarang giorganisar ni sa mga lokal nga parokya nga diin aktibo kaayo si Mama.  Tingali dili lang mga Cebuano ang naghimo ani, tanang Pilipino nga mahigugmaon sa Diyos nagbuhat sab nini. Buhaton kini sa kaadlawon agi og sakripisyo sa tawo nga dunay espesyal nga intension panahon sa katalagman, kalamidad, gubat ug uban pa.

Ang pag “aurora” giingong nagsugod panahon pa sa karaang panahon o Middle Ages, magprosisyon aron mohangyo sa Kahitas-an og ulan, maayong panahon ug panahon nga dunay katalagman. Giingon nga dako kini og papel sa kinabuhi sa mga relihiyosong mga tawo. Maayo kaayo kining “aurora” karong gihamok ang kalibotan sa coronavirus, apan tungod sa direktiba sa gobiyerno nga nagdili sa pagtapok-tapok sa mga tawo sama sa mga relihiyosong kalihokan nagpugngan ang mga magtutuo pagbuhat aning maong prosisyon.

Atubangan niining maong katalagman, mahinungdanon kaayo nga ang tanan mogahin og panahon sa pag-ampo aron maluwas gikan niini maong sakit nga nikalas na og liboan ka kinabuhi ug nagbilin og kasakit ug pagantos sa kadaghanan. Kinahanglang modangop kita alang sa atong espirituhanong panginahanglan sa Balaang Bata, Senor Santo Niño de Cebu, sa Sacred Heart of Jesus, ug sa atong minahal nga Inahan, Mama Maria, sa atong igsuon, Servant of God Bishop Teofilo Camomot nga motabang pagpaabot sa atong pagampo aron tapuson na kini nga balatian.  Mas gikinahanglan karon ang pag-ampo, paghalad og sakripisyo bisan diha kini buhaton sa balay.

Basin pa diay, ini og kahuman aning tanan, ang Santo Papa Pope Francis, pinaagi sa inisyatiba nilang Fr. Sam ug Fr. Mhar Balili, mosugot nga moari sa Sugbo aron duawon si Bishop Camomot sa Valladolid, Carcar ug sa Basilica Minore del Santo Nino una mobalik sa Roma. Murag damgo ra, pero basin pa diay? Ang Ginoo molihok ra baya sa hilom bisan gani kadtong imposible matinuod gani. Nabanhaw man gani Siya human sa kamatayon—mihayag ang kangitngit sa Iyang lubnganan. IBM (BANATNEWS)