COVID19 update: Nadugangan og duha ang positibo sa COVID-19
![COVID19 update: Nadugangan og duha ang positibo sa COVID-19](https://media.philstar.com/photos/2020/04/11/covid_2020-04-11_21-14-46.jpg)
CEBU, Philippines — Nadugangan og duha ang mga nagpositibo sa COVID-19 sa Cebu City, samtang dunay usa nga nag-positibo human sa retest, base sa data nga gipagawas sa Department of Health (DOH) - 7.
Ang maong duha ka bag-ong nagpositibo kabahin sa 110 swab samples nga gipaubos sa test kagahapon Abril 11. Ang uban pulos negatibo. Tungod sa maong duha ka bag-ong nadugang nahimo nang 25 ang positibo sa COVID-19 sa Cebu City nga gihulagway ni Governor Gwendolyn Garcia sa sayo pa nga maoy epicenter sa COVID-19 sa Central Visayas. Base sa gipagawas nga pamahayag sa DOH-7 kagahapong adlawa, usa pa gihapon ang positibo sa Bohol, tulo sa Cebu Province, upat sa Negros Oriental, tulo sa Lapu-Lapu City, duha sa Mandaue City ug wala sa Siquijor.
Sa samang pamahayag sab sa DOH nga dunay unang duha ka nagpositibo sa unang test nga nigawas nga negatibo karon. Way nadugang sa mga nakalas ug pabilin kining walo sa talaan. Base sa datos sa Abril10, ang 12 ka district hospitals ug upat ka provincial hospitals sa probinsya sa Sugbo dunay usa ka influenza like illness (ILI) ug lima ka severe acute respiratory infection (SARI).
Ang mga local government units sa probinsya sa Sugbo dunay 34,658 ka persons under monitoring (PUMs), 221 ILIs, ug upat ka SARIs. Samtang 23,082 na ang nakakompleto sa mandatory 14-adlaw nga home quarantine.
Spray, misting
Sa pikas bahin, si Garcia supak sa pamahayag sa DOH nga mas makadaot ang spraying o misting batok sa COVID-19.
“I would tend to disagree. I am sorry I am just a layman but I think I would rather take a cue from the more advanced countries that are actually currently conducting also spraying and disinfecting. Basta lang, atong siguraduon di lang higupon ang kanang gi-spray,” matud pa niya.Niadtong Biyernes ang DOH miingon:“there is no evidence to support that spraying of surfaces or large-scale misting of areas, indoor or outdoor with disinfecting agents, kills the virus.”
“Spraying or misting may even cause harm as it can cause pathogens to be dispersed further, cause skin irritation or inhalation of chemicals and subsequent development of respiratory side effects and may lead to environmental pollution,” dugang pa niini.
Apan si Garcia miingon nga ang tumong niini mao ang pag-disinfect sa mga butang nga naa sa gawas. “Of course, obviously it is not meant to kill the bacteria inside the body. It is meant to disinfect the surfaces,” matud niya.
Dugang 233
Ang DOH mipahibalo nga dunay nadugang nga 233 ka bag-ong nagpositibo sa virus sa tibuok nasud ug nahimo na kini karon tanan og 4,428 gikan sa 4,195. Samtang niabot na og 247 ang nakalas human nadugang ang 26 ka mga bag-ong namatay. Miabot na sa 157 ang mga nangaayo human nadugangan og 17 kagahapong adlawa.
Sa pikas bahin, ang gobiyerno sa Amerika midonar og 1,300 ka mga bag-ong folding beds nga gamiton unta sa joint military exercise kauban sa Armed Forces of the Philippines apan wala na mahinayon aron atubangon kining hulga sa maong virus. Ang maong mga higdaanan gidonar ngadto sa Office of Civil Defense nga maoy gitahasan ni Presidente Duterte nga motipon sa tanang donasyon batok sa COVID-19. Sa tibuok Southeast Asia, ang Pilipinas maoy pinakadako og nadawat nga hinabang gikan sa Amerika aron batokan ang COVID-19. /IBM
- Latest