Polis ‘nangareglo’ gipadakop

CEBU, Philippines — Usa ka polis ang nadakpan sa entrapment operation nga gipahigayon sa Integrity Monitoring Enforcement Group Visayas Field Unit human kini gipasanginlang miareglo sa dinakpan niini sa ilegal nga drugas sa Silangan 2 sa Barangay Tejero sa Dakbayan sa Sugbo.

Giila ang maong polis nga si Police Corporal Winefredo Olongayo, usa ka Drug Enforcement Unit Personnel sa Waterfront Police Station.

Matud ni Cebu City Police Office (CCPO) Director Police Colonel Hector Grijaldo nga mireklamo ang igsuon nga dinakpan ngadto sa IMEG Visayas Field Unit nga gipangayoan sila ni Olongayo og aircon aron tabangan nga maareglo ang kaso sa igsuon.

Dugang pa ni Grijaldo nga wala magdahom ang hepe sa Waterfront Police Station nga aduna gihapoy mga polis nga mosulod sa illegal ilabi na sa pagdawat og bayad gikan sa illegal nga drugas.

Nakuha sa kapolisan ang aircon nga maoy gipangayo ni Olongayo ug ang issued firearm niini nga adunay mga bala.

Gisulayan og kuha sa habig sa Banat News si Olongayo apan nagdumili kini sa pagtubag sa alegasyon batok niya. Apan kini miingon nga nagsabot sila sa tagiya nga iyang paliton ang aircon og P10 mil , wala siya magtuong ipadakop siya.

Kauban sa operasyon ang mga sakop sa Regional Special Operations Group (RSOG), Waterfront Police Station ug CCPO City Intelligence Branch.

Samtang si Police Regional Office (PRO7) Police Brigadier General Albert Ferromiingon  nga magsilibi kining  leksyon sa mga polis nga padayon gihapong migamit sa ilang trabaho aron mangwarta gikan sa illegal nga drugas.

Kasong kriminal ug adminstratiba ang isang-at nga kaso batok kang Olongayo. /IBM (BANATNEWS)