ECQ hunongon kun

CEBU, Philippines — Wala isalikway ni Department of Interior and Local Government (DILG) Undersecretary Jonathan Malaya ang pagtangtang na sa enhanced community quarantine bisan sugod karong adlawa basta suportado sa pagtuon o may basehan sa siyensiya ang pagpahunong niini.

Sa gihimong online press conference pinaagi sa Zoom, si Malaya miingon nga mahimong mag-anam anam ang mga local government units paghunong sa gipatuman nilang ECQ ilabi na sa mga lugar nga wa gyuy kaso sa COVID-19 case ug kadtong gamay ra kaayo ang persons under monitoring (PUM) ug persons under investigation (PUI).

"Yes, it is possible. Everything is possible really... but it has to be based on science," pasabot pang Malaya.

Sumala pa niya, ang gobiyerno nigamit og data analytics aron pagtino kun unsa ka epektibo ang gipatumang ECQ sa nagkadaiyang mga lugar.

Kalakip niini ang pag-monitor sa mga cellphones pinaagi sa cellphone trackers diin makita kun nagpuyo raba sa panimalay ug nituman ang mga tawo sa ECQ nga usa sa rekisito. Sumala pa nga inisyatiba kini sa mga dagkong global data companies.

Usa sa mga sanglitanan niini ang Google, maka-rekord kini sa kalihokan sa publiko diha sa pangpublikong lugar o sa mga panimalay sa kada nasud.

"Madami pong data na kinokonsidera ang gobyerno to determine king saang areas successful 'yung quarantine at saang areas hindi successful ang quarantine. I'm just not of liberty to share right now yung parameters share na ginagawa," pasabot pa niya.

Apan siya miklaro nga ang opinion lang sa mga doktor o medical experts ang matuman ug sila ray motambag sa gobiyerno kun unsay buhaton.

Matud niya, kun ang palugakan sa LGU ang ilang ECQ mahimong mangabli ang pipila ka establisamento apan hugot ang regulasyon. Apan giangkon niya sa pagkakaron, wala pa kini gituki tungod kay ang gitan-aw kun lugwayan o dili na ang ECQ.

Wa pa hibaw-i

Sa pikas bahin, si Governor Gwendolyn Garcia mibutyag nga sayo pa kaayo aron mabanabana kun kanus-a niya libkason ang ECQ. Mao kini iyang giesplikar sa inadlaw niyang press conference kagahapon sa hapon bahin sa iyang Executive Order 5-O nga wala magbutang kun kanus-a tapuson ang lockdown.

Sumala pang Garcia kini aron di hatagan og “false hope” ang mga Sugboanon.

“I did not want to give false hopes to the Cebuanos. I did not want them to look at a particular date. It would be like a promise that I may not be able to keep and so i kept that open,” matud pa niya.

Sumala pa niya, usa sa iyang gikonsiderar ang mga kalanboan didto sa Luzon nga maoy epicenter sa COVID-19 sa nasud karon. Matud niya konektado ang Sugbo sa Metro Manila ug mas maayong iampo sab sila didto nga mapadali nga makontrol ang virus.

ECQ extension

Ang Police Regional Office 7 pabor kun lugwayan pa og usa ka buwan ang ECQ sa mga probinsya  sa Central Visayas sumala pang Police Brigadier General Albert Ferro tungod kay mas mapadali ang pagpahigyon nila sa contact tracing sa mga natapnan sa COVID-19.

“It’s (extension) okay. It will give us more time to validate the persons under investigation and the persons under monitoring. At the same, our medical force will have more time to respond accordingly. That will really give us more time in the containment measures,” matud pa ni Ferro.

Gipasabot sab ni Ferro nga delikado pa sa publiko kun libkason na ang ECQ bisan pa aduna pa gihapoy mga kaso.

Hinuon nakita niya nga epektibo ang gipatumang ECQ dinhi sa Central Visayas. Sheriza Mae Uy/IBM (BANATNEWS)