Mga baligyaon sa mobile market mahurot dayon

CEBU, Philippines — Gipahigayon nga mobile market sa Dakbayan sa Sugbo dali ra mahurot ang mga baligyaon niini tungod sa kadaghang mamalit.

Kini ang gibutyag ni Jonil Matuguina, Cebu City Market Administrator.

Matud ni Matuguina nga ilang gipaningkamutan nga mas daghan pang manindahay ang moapil sa mobile market aron maadtoan ang mga lugar nga ni-request sa mobile market. Sa pagkakaron naa pa lang sa 22 ka vendors ang nangapil sa mobile market ug kutob sa ganahan sa moapil andam nilang dawaton.

Ang mga manindahay sa mobile market giingong katulo magbalik ngadto sa Carbon Public Market aron mokuha og supplies tungod kay dali kaayo mahurot ang ilang mga baligyaon nga isuroy. Nasayran nga upat na ka barangay ang naadtoan sa mobile market nga gilangkuban sa Apas, Quiot, Budlaan ug Sambag II.

Hangyo ni Matuguina sa mga tawo nga moadto sa mobile market nga mosunod sa guidelines sama sa pagsul-ob og mask, social distancing ug uban pa. /BDB (BANATNEWS)