Ferro: “Shoot to kill order” dili angay tinambanon pagsabot

CEBU, Philippines — Walay nakitang dautan ang direktor sa Police Regional Office 7 Police Brigadier General Albert Ferro sa pamahayag ni Presidente Rodrigo Duterte  nga ipapusil patay ang mga walhong maghimo og kasamok atol sa paghatag og relief operations sa gobiyerno.

Si Ferro miingon nga dili sila mogamit og kusog kung dili mabutang sa kakuyaw ang kinabuhi sa mga polis, sundalo ug mga sibilyan gumikan niining mga gilusad nga lihok protesta sa mga militanteng pundok tungatunga niining krisis dala sa coronavirus (COVID-19).

Kahinumdoman nga giulan og mga pagsaway ang presidente human sa iyang pamahayag apan giklaro sa mga opisyales palibot sa pangulo nga wala masabti sa tanan ang buot nga ipaabot sa presidente.

Niadtong Biyernes sa gabii sa national television gipasabot ni Duterte ang iyang gipasabot nga “shoot to kill order” batok sa mga leftist sama sa nahitabong hulga sa kagubot sa kauluhan. Giawhag sab ni Ferro ang publiko nga unta sabton og maayo ang gipanulti sa presidenti ug dili kini hubaron sa literal nga pamaagi ug dauton na hinuon ang gobiyerno ilabi na sa panahon nga giatubang karon sa problema sa panglawas.

Sumala pa niya, usa lamang kadto ka kinaiya sa pangulo ang magpaturagas og tabi ug dili kinahanglang mabaw ang pagsabot.

“Dili man, sometimes the people misinterpret the pronouncement of the president, those are rhetoric, we should read between the lines but not necessarily pag wala na siyay sala, pusilon na nimo? Just wrong,” matud pa ni Ferro.

Usa na niini mao ang nahitabong kagubot sa pagpanghatag og relief goods sa Dakbayan sa Quezon niadtong Abril 2 nga niresulta sa kagubot human nga dunay mga militanteng pundok nga niulhog sa mga tawo pagprotesta.

Gipasabot ni Ferro nga igo ra sila mosunod kung unsay mando sa ilang labaw apan sa legal nga pamaagi. /IBM (BANATNEWS)