Wa panumbalinga ang init

CEBU, Philippines — Ang kainit sa panahon wala kini panumbalinga sa mga frontliner nga anaa sa kadalanan aron mapatuman ang Enhanced Community Quarantine nga giluwatan sa kagamhanang lokal sa Dakbayan sa Sugbo.

Atol sa pagsubay sa Banat News sa mga kadalanan lakip usab sa mga lugar diin adunay mga checkpoint diha sa border nagbuwad sa init ang kapolisan, mga sakop sa Cebu City Transportation Office, barangay tanod ug ubang mga frontliner volunteer aron mosusi sa mga mosulod ug gawas sa dakbayan.

Matud ni Senior Police Officer 4 Reynold Malazarte, team leader sa mga nihimo og checkpoint sa mga mosulod sa  Barangay Talamban nga  moagi diha sa M. L Cuizon, Barangay Cabangcalan, Dakbayan sa Mandaue City nga wala kaayo silay mga nasugatan nga problema atol sa pagpatuman sa Enhanced Community Quarantine.

Si Malazarte nagkanayon nga kadtong anaa sa guidelines lang ang gitugotan nilang makasulod sa siyudad base sa gihuptan nilang kamandoan kalabutan sa ECQ. Gitug-an ni Malazarte nga bisan sa kainit sa panahon kinahanglang mopahigayon sila sa ilang serbisyo alang sa kaayohan sa tanan.

Gihangyo ni Malazarte ang katawhan nga magpabilin lang gyud sa ilang balay kong wala man silay mga importante nga tuyo ug wala usab sila malakip sa exemption sa pagpatuman sa ECQ.  /BDB (BANATNEWS)