Mag-panic buying, mamundo silotan
CEBU, Philippines — Duna nay multa ug pagkapriso ang mga tawong masakpang mamundo og daghan ug mag-panic buying og batakang mga panginahanglan panahon nga adunay krisis o katalagman sama sa nasinati karong coronavirus disease (COVID-19).
Ang Sangguniang Panlalawigan sa Sugbo nipasar og Anti-Hoarding ug Anti-Panic Buying Act sa tibuok Lalawigan sa Sugbo.
“This Ordinance is crafted to prevent the possible supply chain disruption on basic and essential necessities and to likewise ensure the availability of such goods and products during the duration of the declared National Public Health Emergency,” pagbasa sa maong ordinansa.
Sa report sa Sugbo News, ang maong balaod gihimo aron dili magpalabi og pamalit ang mga konsumidor ug mahutdan na hinuon og supply ang uban para sa ilang panginahanglan.
Sakop sa maong ordinansa ang tanan, ordinaryong konsumidor ug kadtong mga naninda og mga produktong batakang panginahanglan.
Ang mga konsumidor nga molapas sa maong ordinansa pamultahon og P1,000 sa first offense; P3, 000 sa second offense ug P5,000 lakip na og usa ka tuig nga pagkapriso sa ikatulong offense.
Ang registered retailers, sari-sari store owners, restaurant ug hotel operators lakip na ubang magpapatigayon nga molapas sa ordinansa mas bug-at og silot sama sa multahan og P3,000 sa first offense; P5, 000 sa ikaduhang offense ug P5,000 gihapon sa third offense apan mapriso sulod sa usa ka tuig.
Ang business permit sa makalapas ma-revoke sa local government unit ug di na tugtan pa makakuha balik niini. /IBM (BANATNEWS)
- Latest
