Mga bangko gihangyo

CEBU, Philippines — Gitinguha ni Cebu City Mayor Edgardo Labella nga magpadayon ang operasyon sa mga bangko ug mga automated teller machines (ATMs) sa dakbayan sa Sugbo bisan sa gipatumang Enhanced Community Quarantine (ECQ) sa siyudad tungod sa coronavirus COVID19.

Si Labella misuwat sa presidente sa Cebu Bankers Association Club, Niel Yu, kalabot sa maong hangyo. Buot sab niyang usahon ra ang oras sa tanang mga banko gikan sa alas 9 sa buntag hangtud ala-una sa hapon, gawas lang niadtong mga banko nga naa sulod sa malls nga mahimong mo-extend sa oras ngadto sa alas 3 sa hapon. Samtang ang mga bangko sa gobiyerno sama sa DPB ug Landbank nga ipadayon ang usual banking hours gikan sa alas 9 sa buntag hantod sa alas 4 sa hapon. Sa pikas bahin, nalipay si Labella nga miboluntaryo ang ubang mga hotels nga papuy-on og libre ang mga frontliners nga naglisod paguli sa ila gikan nag-duty tungod gidili naman ang mga biyahe sa pasaheroan.

Matud ni Labella, ang White Knight sa eskina Gorordo Avenue  ug General Maxilom mitagana sa ilang usa ka floor para sa frontliners, lakip sab ang Braford Church mipahibalo nga duna silay 15 ka lawak para sa frontliners.

Kadtong mga gustong mo-avail sa maong kahigayunan makig-alayon lang kang Cebu City Administrator Atty. Floro Casas. /IBM (BANATNEWS)