Mga kabus prayoridad sa hinabang

CEBU, Philippines — Prayoridad sa mga local government units (LGUs) nga tabangan ang mga indigents ug mga nawagtangan og panginabuhian nga mga residente niining pagpaubos sa tibuok Lalawigan sa Sugbo sa Enhanced Community Quarantine (ECQ).

Kini subay sa giluwatan ni Gob. Gwendolyn Garcia nga Executive Order No. 5-O diin gilatid ang mga lagda sa ECQ.

Gitataw nga ang unahon sa paghatag sa hinabang ang mga indigents ug kadtong nagpuyo ubos sa poverty line, nawagtanga og trabaho, senior citizens nga wala nay laing panginabuhi ug kadtong gipaubos sa mandatory quarantine nga walay pangita.

Ang mga mayor motabang sab sa mga barangay kapitan sa pagkuha sa profile sa mga hingtungdang indibidwal.

Gidili sab sa maong EO ang pagpatapok sa mga tawo sa pagkuha sa hinabang ug ipahatud kini sa tagsatagsa ka panimalay. – Gikan sa The Freeman/GMR

Libreng sakay sa may QP sa Talisay

Moabot sa 13 ka sakyanan sa Dakbayan sa Talisay ang gitagana nga gamiton aron serbisyohan og libreng sakay ang adunay mga Quarantine Pass (QP) karong adlawa sa pagpatuman sa Enhanced Community Quarantine (ECQ) sa tibuok Probinsiya sa Sugbo.

Adunay pito ka L300 van ug unom ka bus ang motadlas sa nagkadaiyang kadalanan sa dakbayan nga mopasakay sa adunay QP nga gihatag matag pamilya kinsa gitugutan nga makagawas aron mopalit sa mga batakang panginahanglan.

Ang matag pasahero magdala sa ilang QP, magsul-ob og mask, usa lang ka hand carry ang pwede dad-on ug ang sakyanan adunay usa ka oras ang lat-ang sa paglarga.

Sigon pa ni Mayor Gerald Anthony “Samsam” Gullas Jr. nga ang ECQ nga gimando ni Gobernador Gwendolyn Garcia angay nga sundon kay kini maoy usa sa paagi nga dili mokatap ang Coronavirus Disease.

Gihangyo sa mayor ang tanan nga dili na mogawas sa ilang pinuy-anan ug sabton ang sitwasyon kay alang ra kini sa kaayuhan. /GMR (BANATNEWS)