Mga bugas gi-deliver na ngadto sa 80 ka barangay sa Cebu City
CEBU, Philippines — Giklaro ni Konsehal Raymond Alvin Garcia nga nagsugod na ang delivery sa mga bugas ngadto sa 80 ka Barangay sa Siyudad sa Sugbo.
Kahinumduman nga ang Cebu City Government nagpalit og 100,000 ka sakong bugas isip ayuda sa mga tawo nga apektado sa covid-19.
Matud ni Garcia nga ang delivery sa bugas sa nagkadaiyang barangay sa Cebu City molanat og pito ngadto na sa napulo ka adlaw tungod kay adunay mga mountain barangay nga layo.
Ang distribution sa bugas depende na kini sa mga barangay kapitan kanos-a ihatag gumikan kay inig abot sa mga bugas diha sa barangay i-repack pa kini.
Ang Armed Forces of the Philippines ug Philippine National Police motabang sa pag-distribute sa mga bugas aron masiguro nga han-ay ug hapsay nga pagpang-apod-apod.
Sa laing bahin, tinguha sa kagamhanan sa Siyudad sa Sugbo nga mahatag na ang financial assistance sa mga senior citizen sa buwan sa Marso ug Abril.
Kini maoy gipahibawo ni Cebu City Mayor Edgardo Labella atol sa iyahang press conference kagahapon sa buntag.
Gumikan kay gipatuman man ang social distancing aron malikayan ang pagkatap sa covid-19 tun-an sa siyudad ang mga pamaagi nga ipatuman sa distribution. /BDB (BANATNEWS)
- Latest
