Angay lang pilion ang unahon sa COVID test

CEBU, Philippines — Angay lang pilion kung kinsa ang unahon sa pagpaubos sa test sa coronavirus disease.

Kini sumala pa ni Gob. Gwendolyn Garcia gumikan kay limitado lang ang niabot nga mga testing kits sa Vicente Sotto Memorial Medical Center, ang sub-national testing laboratory sa Visayas. Matud ni Garcia nga kinahanglan nga ipalabi ngadto sa mga tawo nga adunay Influenza-Like Illnesses (ILI) ang maong testing kits.

“Katong mga patients under investigation nga nag-exhibit na og influenza like illnesses, inig test then proven negative then we can immediately decongest our hospitals and focus the spaces more sa katong nagkinahanglan gyud og tabang,” matud ni Garcia.

Si Garcia nagkanayon nga ang mga nagpakita og sintomas maoy angay nga unahon sa test.

“When you test someone who is asymptomatic he could be negative now, but tungod kay wala nato i-limit ang kits, maigo siya og laing carrier later on then mag-positive na pud siya, testing na pud nato. It’s a waste of testing kit,” matud ni Garcia.

Tungod kay may kapabilidad naman ang VSMMC nga mo-test og specimen sa COVID-19, matud ni Garcia nga posible nga mosaka ang gidaghanon sa mga magpositibo sa kaso.

“Which is why, in our calibrated response, measured steps, gianam-anam na nato og sugod ang people movement, gikan sa pag-awhag lang usa to stay at home, karon duna nay specific sector na karon subject for 24 hours curfew,” matud ni Garcia.

PUM gipabantayan

Samtang ang 52 ka Persons Under Monitoring (PUM) ang higpit karon nga gipabantayan sa mga sakop sa Barangay Public Safety Officer (BPSO) sa Barangay Cubacub, Dakbayan sa Mandaue.

Matud ni Kapitan Almario Bihag nga kini aron pagseguro nga ang mga bag-o nga nahidangat sa ilang dapit dili magpataka og gawas-gawas.

Hugot usab nilang gibantayan ang mosulod nga mga sakyanan sa ilang lugar pinaagi sa pagsusi sa mga sakay gamit ang gun scanner.

Ilang gipalihok ang mga barangay health workers, barangay tanod, sakop sa Sangguniang Kabataan ug mga volunteers sa pagbantay sa kadalanan sa ilang lugar.

Gipalihok usab nila ang mga sakop sa Emergency Response Team sa barangay nga gitahasan sa house-to-house nga pag-disinfect sa mga panimalay sa ilang dapit ingon man ang mga nagpuyo niini.

Matud ni Bihag nga sila sa barangay ang naghatag og bugas ug mga de lata nga pagkaon nga naglakip sa sardinas, noodles ug uban pa.

Ang mga habal-habal drivers nga higpit nilang gidid-an sa pagbiyahe tungod sa social distancing ang kasamtangan usab nga ilang gihatagan og bugas ug mga de lata. Romeo T. Limpangog/GMR (BANATNEWS)