Hotel rooms gamiton sa quarantine

CEBU, Philippines — Dili mominus siyam ka hotels sa Sugbo ang niuyon nga mahimong quarantine room ang ilang mga lawak alang sa mga langyaw nga moabot sa Sugbo.

Matud ni Maria Lester Ybañez, ang provincial tourism officer, nga anaa sa 2,000 ka lawak ang mahimong quarantine facility. Ubos sa Executive Order ni Gob. Gwendolyn Garcia nga ang mga langyaw maoy mobayad sa pagpaubos sa quarantine sa mga hotels sulod sa 14 ka adlaw.

Si Garcia nagkanayon nga pinaagi niini mahalinan gihapon ang mga hotels.

Dugang ni Garcia nga anaa ra sa hotel kun mohatag og diskwento.

Ang mga ipaubos sa quarantine adunay protocol sa paghatud sa pagkaon.

PUM nga polis

Nisaka sa 103 ka polis sa Police Regional Office 7 ang gipaubos isip mga Person Under Monitoring sa Regional Health Service (RHS).

Kini maoy gibutyag ni RHS-7 Chief, Police Colonel Relie David Canlas, human gikan sa 42 ka polis nisaka kini ug adunay pipila may sintomas sama sa ubo, sip-on, hilanat ug migraine.

Apan giklaro ni Canlas nga ang mga sintomas mga influenza-like illness ang nasinati sa pipila ka polis.

Ang uban gikan sa kauluhan nitambong og mga seminar, training, ug interview sa promotion sa Camp Crame hinungdan nga gipaubos sila isip mga PUM.

Hinoon gipasabot ni Canlas nga walay angay ikabalaka tungod kay walay mga Persons Under Investigation (PUIs) sa Central Visayas.  Le Phyllis F. Antojado/GMR (BANATNEWS)