2 chinese nidunggo sa ginatilan gisikop

CEBU, Philippines — Duha ka Chinese nationals ang gidakop ug gidiretso pagpaubos og quarantine sa kapolisan sa Ginatilan Police Station human sila milabang gikan sa Negros Oriental luwan sa us aka pumpboat paingon sa Sugbo ug diha midunggo sa maong lungsod.

Matud ni Police Lieutenant Revelito Tadique hepe sa Ginatilan Police Station  nga pasado alas- 6 kagahapon sa buntag usa ka konsehal sa barangay Poblacion ang miadto sa ilang buhatan ug gipahibalo kalabot sa duha ka Chinese nationals nga nidunggo sa ilang baybayon sakay sa usa ka pumpboat.

Naabtan nila ang duha sa Barangay Kalubihan apan ang gisakyan nga pumpboat apan nakabiya na pabalik sa Negros.

Sa ilang pagsukit-sukit,  sila mitug-an nga nipugos sila paglabang sa Sugbo tungod kay gusto na silang mamauli sa China. Apan nasuta nga wala pa silay ticket para sa paglarga didto.

Tungod sa pagpasirado sa mga pantalan sa Sugbo sa mga pasaheroang barko gikan sa mga silingang probinsya daghang mga langyaw nga nangatanggong tungod kay sa Sugbo man nahimutang ang Mactan-Cebu International Airport.

Ang duha ipaubos og 14 ka adlaw nga quarantine tungod sa protocols nga gipatuman aron mapugngan ang pagkatap sa coronavirus (COVID19).

Si Cebu Provincial Police Office (CPPO) Director Police Colonel Rhoderick Mariano nanawagan sa mga barangay officials sa coastal barangays nga magmabinantayon sa ilang kabaybayonan. Mipasidaan sab siyang nga mahimung dakpon ang mga tagiya og pumpboats nga mapalusot og pasahero dinhi sa Sugbo. /IBM (BANATNEWS)