Mga balay kalingawan gipasuspenso

CEBU, Philippines — Laing executive order ang gipagawas ni Cebu City Mayor Edgardo Labella kabahin gihapon sa lakang batok sa Coronavirus Disease 2019.

Ang Executive Order No. 56 nagmando sa pagpahunong una sa tanang enclosed recreational centers, fitness centers, gym, movie houses, o movie theater, casinos, bars ug clubs hangtud nga ang general community quarantine nga gipatuman malibkas na.

Ipatuman dayun ang maong EO human napirmahan na ni Labella kagahapon.

Nimando sab si Labella sa tanang jail facilities sa dakbayan nga kanselado una ang pagbisita sa ilang mga minahal sa kinabuhi.

Si Labella mopadala og notice sa mga nagdumala sa Operation Second Chance, Cebu City Jail Male Dormitory ug Cebu City Jail Female Dormitory aron ipatuman dayun kini hangtud sa Abril 18 depende sa lakat sa COVID-19.

Mga negosyante

Samtang gipahibawo sab ni Labella nga ang Cebu Chamber of Commerce and Industry niumol og COVID-19 Action Team.

Ang mga mall operators mohatag sab og konsiderasyon sa lease payments sa ilang mga tenants.

Matud ni Labella nga ang Cebu Bankers Club mohatag sab og 30 ka adlaw nga hangyo sa loan payments.

Ang Metropolitan Cebu Water District mohatag og 5 porsyento nga diskwento ug nipasalig sab nga wala’y putol sa tubig ug wala’y penalties.

Ang MCWD mo-deploy sab og 20 ka dagkung water trucks aron pag-mobilize sa water      service.

Gitataw sab ni Labella nga dili nila tugtan kadtong mga magpapatigayon nga mopahimulos sa higayon ilabi na karon nga naglisud ang katawhan tungod sa COVID-19.

Ang masakpan dili i-renew sa siyudad ang business permit aron dili na kini maka-operate.

Social distancing

Gumikan sa social distancing nga gipatuman daghang sumasakay ang natanggong hinungdan nga ang kagamhanan sa siyudad mopatakap og bus sa nagkalain-laing rota.

Ang pick-up time magsugod sa alas 6 sa buntag hangtud sa alas 10 sa buntag ug alas 5 sa hapon hangtud sa alas 9 sa gabii apan gihimug-atan ni Labella nga ipatuman gihapon ang social distancing.

Lakip nga tutukan sa Cebu City Police Office ang pagpatuman sa social distancing sa mga habal-habal.

Kini ang gibutyag ni CCPO Director Engelbert Soriano subay sa Department of Transportation.

Matud ni Soriano nga kadto lang magtiayon ang ilang tugotan nga moangkas sa motorsiklo tungod kay wala silay rason nga ipatuman ang social distancing sanglit mag-uban ra man sila sa panimalay.

Giklaro ni Soriano nga dili sila mangdakop og mga motorista apan igo lang sila nga mopahimangno alang sa kaluwasan sa publiko.

Dugang ni Soriano nga igo lang sila nagpatuman sa EO ni Labella ilabi na sa pagpahigayon og checkpoints sa mga utlanan sa siyudad.

Gidili sa internetan

Sa laing bahin moluwat og memorandum si Gobernador Gwendolyn Garcia sa pagdili sa mga tinun-an nga mosulod og internet cafe aron magduwa.

"The initial recommendation was to close it kay karon walay klase toa ang mga bata sa internetan but malooy sad ta sa negosyo mao na nga ang atong isunod ana nga memorandum mao to deny entry for all students," matud ni Garcia.

Si Garcia nitataw hinoon nga ilang ikonsiderar ang mga tinun-an nga mohimo sa ilang proyekto sa eskwelahan nga kinahanglan taposon human gisuspenso ang klase.

"As much as possible and this is a plea to all. Please stay at all," matud ni Garcia. Rowena D. Capistrano, Sheriza Mae R. Uy, Le Phyllis F. Antojado/GMR (BANATNEWS)