Batobalani sa Gugma dili wangwang pagrekorida

CEBU, Philippines — Mga molupyo sa parokya sa Barangay Pasil ug Barangay Suba sa Dakbayan sa Sugbo nga naigo sa sagunson nga kalamidad sa sunog sa nanglabay nga mga semana midangop sa Kahitas-an nunot niining hulga sa novel coronavirus COVID19.

Si Fr. Lamberto “Jun” Paradiang,SDB,  kura paroko sa maong parokya miingon nga nakigalayon na sila sa mga barangay kapitan sa Pasil ug Suba nga ini og abot sa alas-8 sa gabii inay nga siren o wangwang ang awit nga Bato Balani sa Gugma maoy ilang patukaron ug paglitok sa Oratio Imperata.

Ang Dakbayan sa Sugbo pinaagi ni Mayor Edgardo Labella mipaubos sa siyudad sa general community quarantine ug kalakip niini ang pagpatuman sa curfew nga magsugod sa alas-8 sa gabii hangtud sa alas-5 sa kaadlawon.

Ang tumong niini mao nga mamenusan ang tsansang magkatinakdanay sa virus ang mga tawo. Mas gihigpitan na sab ang pagsulod ug gawas dinhi sa siyudad tungod gihapon sa maong rason.

Si Paradiang sa pakighinabi sa Banat News miingon nga gawas sa pagtuman sa mga kamandoan sa Department of Health ug sa gobiyerno, ilaha kining gipaapilan og pangaliya sa Balaang Bata isip patron sa ilang parokya.

“The crowd is always here, mao nga we asked for Divine Intervention and constant reminder on proper hygiene. Ato ning gitugyan sa Senior Sto. Niño. Kining kanta (Batobalani sa Gugma) ato ning patukaron agi og pagsangpit Kaniya,” matud pang Paradiang. Si Brgy. Pahina San Nicolas Kapitan Clifford Jude Niñal  nga nakahinabi sa Banat News miingon nga gawas sa Batobalani ilaha sab pasabton ang katawhan kabahin sa pagamping batok sa COVID-19 ug kun nganong kinahanglan ang curfew.

Giangkon ni Niñal nga sa unang adlaw sa curfew sa miaging gabii duna gyud mga nasagmuyo ilabi na kadtong naninda og pagkaon tungod kay wala sila mahalini kay ang mga tawo nangahadlok mogawas. Ang maong barangay sakop sa San Nicolas de Tolentino diin makaplagi ang imahe sa Senior Sto. Niño sa panahon sa Katsila.

Gipanawagan sab ni Paradiang ang mga molupyo nga kun mahimo dili nalang gyud mogawas-gawas sa ilang panimalay kay nagtuo siyang dako kaayo og matabang ang publiko pagpahunong sa pagtakod niining maong virus. IBM (BANATNEWS)