Way lockdown sa Olango

CEBU, Philippines — Dili tinuod ang nikatap nga taho sa social media nga gipatuman ang lockdown sa Isla sa Olango sa Dakbayan sa Lapu-Lapu tungod sa giingong presensya sa tawo nga dunay coronavirus disease.

Nunot niini gimanduan ni Mayor Junard “Ahong” Chan ang IT Department sa kagamhanan sa dakbayan sa pagsubay sa tinubdan sa sayop nga taho alang sa tukmang lakang batok niini.

Si Chan ang hugot nga nagpahimangno niadtong nagpasiugda sa pagpakatap og sayop nga kasayuran sa social media sanglit mahimo kining kapahamtangan og silot tungod kay makahatag man kini og kaguliyang sa mga tawo.

“Usbon ko, wala pay order sa pag-lockdown sa atong siyudad ug wala pay confirmed nga kaso sa virus gikan sa DOH o uban pang ahensya nga nag-monitor 24/7 sa alang sa seguridad natong mga Oponganon,” matud ni Chan.

Giawhag sa mayor ang katawhan nga kung gusto sila og mga updated nga sitwasyon mahimong makig-alayon sa ilang buhatan o mosusi sa mga pages sa ahensya sa gobiyerno sama sa DOH.  Rowena D. Capistrano/GMR (BANATNEWS)