Ordinansa alang sa benepisyo sa solo parent giaprobahan

CEBU, Philippines — Giaprobahan sa konseho sa Dakbayan sa Sugbo ang ordinansa nga naghatag og diskwento ug insentibo sa mga solo parent sa Dakbayan sa Sugbo.

Ang ordinansa subay kini sa Akta Republika 8972 kun “Solo Parents’ Welfare Act of 2000”.

Ang maong ordinansa nga giduso nila ni Konsehal Alvin Dizon, Eduardo Rama Jr. ug Lea Japson natinguha kini sa paghatag og dugang benepisyo ug prebilihiyo sa mga solo parent ug sa ilang mga anak ubos sa pakigtambayayong sa mga pribadong sektor.

Tumong niini nga maibanan ang kalisod nga nakatagamtaman sa mga solo parent ug sa ilang mga anak.

Ubos sa section 5 (a) sa ordinansa mao ang diskwento sa gipalit nga mga butang ug serbisyo nga nagkanayon "solo parent, upon presentation of his/her identification card (ID) duly issued by the Department of Social Welfare and Services (DSWS), shall enjoy a 10% discount  on purchase goods and services”.

Lakip niini mao ang mga grocery item; gamit sa eskwelahan alang sa ilang mga anak; pagtan-aw og sine, parke, salon ug spa, ug fitness diin ang mga solo parent makapahimulos niini matag una ug ikatulo nga Sabado sa bulan.

Samtang ang mga serbisyong medikal ug dental; bokasyonal ug pormal nga diskwento sa serbisyo sa edukasyon kinahanglan nga ihatag sa oras nga ang serbisyo i-avail. /BDB (BANATNEWS)