420 ka estraktura sa Oslob nasulod sa easement zone

CEBU, Philippines — Niawhag si Gobernador Gwendolyn Garcia sa mga resort owner ug tag-iya og balay diha sa upat ka barangay sa Lungsod sa Oslob nga boluntaryo nga moguba sa ilang estraktura nga nasulod sa easement zone.

Base sa report sa PENRO nga niabot ngadto sa 420 ka establisamento apil na ang barangay hall ug uban pang eatablisamento sa Barangay Daanlungsod, Poblacion, Tanawan ug Lagunde ang nilapas sa easement zone.

Atol sa tigom sa probinsiya tali sa mga tag-iya og mga establisamento sa maong mga barangay nipresentar ang PENRO sa ilang inventory niadtong buwan sa Enero hangtud sa Pebrero karong tuiga.

Nasayran nga 157 ka commercial establishments ug 263 residential structures ang nasulod sa easement zone diha sa nahisgutang mga barangay.

Giingong 20 ka establisamento ug 70 ka balay ang nakalapas sa balaod sa easement zone sa Daanlungsod

Sa Barangay Tanawan, 29 ka establisamento ug 21 ka balay usab.

Nikabat sa 15 ka establisamento ug 53 ka balay ang naa usab sa easement zone sa Barangay Lagunde samtang sa Barangay Poblacion,33 ka commercial structures ug 119 ka residential.

Base sa Article 51 sa Presidential Decree 1067 kinahanglang dili masulod sa 20 meter easement gikan sa baybayon ang pagtukod og struktura sa agricultural area samtang tulo  ka metros usab sa urban area.

Ang Oslob usa pa kini ka agricultural area ug tinguha sa Kapitolyo ug Lungsod sa Oslob nga ma-reclassify kini ngadto na sa urban aron nga dili halos tanan sa mga estraktura sa upat ka barangay ang maguba. /BDB (BANATNEWS)