Mga kawani sa OSC posibleng hulipan

CEBU, Philippines — Posibling hulipan ang mga kawani sa Operation Second Chance (OSC) diha sa Barangay Kalunasan, Dakbayan sa Sugbo.

Kini ang gibutyag ni Cebu City Mayor Edgardo Labella apan naghuwat pa siya sa rekomendasyon sa City Legal Office (CLO).

We’ll find out what›s their recommendation and perhaps consider to change some of the people, that will be one of the things that I will seriously consider, matud ni Labella.

Ang OSC usa ka pasilidad alang sa Children in Conflict with the Law (CICL).

Matud ni Labella nga posibleng lakip sa pulihan ang officer in charge sa OSC nga Ambrosio Ibones.

Si Labella nimando na kang Atty. Rey Gealon, city legal officer nga mopahigayon kini og imbestigasyon kabahin sa insidente nga nahitabo diha sa OSC ug isumiter dayon sa iyang buhatan ang report.

Niadtong Lunes sa gabii ang mga residente sa pasilidad nakaeskapo kini ug gikatahong ikaupat na nga higayon ang ulahing insidente sulod sa siyam ka bulan.

Si Labella nagkanayon nga mandoan niya ang officer in charge sa Cebu City Police Office (CCPO) Police Colonel Engelbert Soriano nga magbutang og mga polis diha sa OSC aron mahatagan og seguridad ang maong pasilidad.

Dugang ni Labella nga gikonsiderar usab niya ang posibilidad sa pagbalhin sa pasilidad ngadto sa lain nga lokasyon. /BDB (BANATNEWS)