Mga durugista ug sugarol ang nadakpan
CEBU, Philippines – Natingkagol sa detention cell sa kapolisan sa Lungsod sa Cordova ang upat ka suspetsadong durugista ug upat ka giingong sugarol human sila nasikop sa gipahigayon nga operasyon sa kapolisan niadtong Lunes sa gabii diha sa Sitio Tugbungan, Barangay Pilipog, Lungsod sa Cordova.
Si Police Lieutenant Jan Ace Elcid Layug, hepe sa kapolisan sa maong lungsod nibutyag nga sulod sa usa ka bulan nilang gipanid-an ang ilegal nga kalihokan sa suspetsadong pusher nga si Rodel Baguio Casul, 31-anyos, nagpuyo sa maong dapit.
Si Casul giingong napalitan kini og shabu sa poseur buyer sa kapolisan.
Gawas kang Casul laing tulo ang nasikop nga sila si Kim Hilapit Pacaldo, 24-anyos, Luis Lumapas Berdon, 34 ug Rosemari Avila Brennan, 44-anyos.
Sa laing bahin, Upat ka tawo usab kinsa nalambigit sa ilegal nga sugal ang nasikop sa kapolisan sa Lungsod sa Sogod nga gipangulohan sa ilang hepe nga si Police Lieutenant Roel Sarco Tanza.
Ang mga nakasikop kinsa nagduwa og mahjong diha sa Barangay Calumboyan mao sila si Diosdado Coyoca Ochea, 47-anyos, Armando Impas Mahusay, 46, Virgelia Collantes Cuer, 66 ug Maria Elina Bromate Cuer, 35, pulos nagpuyo sa maong dapit.
Nasakmit sa mga polis ang ang lamesa, petsas, 34 ka token chips ug pusta nga kwarta nga nagkantidad og P170.00. /BDB (BANAT NEWS)
- Latest
