Kawatan ‘mo-remedyo’ pa unta, dakpan hinuon
CEBU, Philippines — Usa ka gidudahang akyat bahay nga nakadala na unta og mga alahas gikan sa gisaka niyang panimalay sa Barangay Mulao, Lungsod sa Liloan nadakpan hinuon human nakadesider nga lugoson ang nag-inusarang babaye nga iyang gikawatan.
Si Police Master Sergeant Jayson Gayo sa Liloan Police Station miila sa suspetsado nga si Mar Noval, 24, nagpuyo sa Brgy. Mulao sa Lungsod sa Compostela.
Matud pa ni Gayo nga nag-inusara lang ang 34-anyos nga babaye kansang pangalan gipugngan sa dihang gisaka kini sa suspek agi sa kisame sa balay. Sumala pang Gayo, sa dihang naa na sa sulod ang suspek nakabantay ang biktima ug naaktohan kini, apan ang suspek daling miibot og armas dayong tion sa babaye ug gimandoan sa paghatag sa mga alahas ug kwarta niini.
Dugang pa ni Gayo, sa kahadlok sa babaye nituman kini paghatag sa iyang alahas. Apan inay nga moikyas, nakahunahuna pa ang suspek nga lugoson ang babaye. Mikisikisi ang biktima ug diha niini nabantayan nga duwaan ra diay ang armas maong dali kining nisiyagit pagpangayo og tabang. Daling nangabot ang mga silingan ug nadakpan ang suspek. /IBM (BANATNEWS)
- Latest
