Abo padayong gibadlis sa agtang

CEBU, Philippines – Hingpit na gisugdanang mga kalihukan sa kwaresma sa Simbahang Katoliko pinaagi sa Miyerkules sa badlis kagahapon.

Atol sa maong ritwal adunay kaparian ang padayon gihapon nga nibadlis sa mga agtang sa magtutuo bisan sa kamanduan sa kadagkuan sa Catholic Bishop’s Conference of the Philippines nga ibudbod lang sa ulo ang abo.

Kini isip lakang nga malikay nga matakdan sa Corona Virus Disease 2019.

Matud ni Fr. Jestoni Del Castillo, sa Academia de San Martin sa Daanbantayan, nga  ang ritwal himoon 40 ka adlaw sa dili pa ang Semana Santa nga magsugod sab sa bendita sa lukay.

Gipasabot ni Del Castillo nga ang kwaresma panahon kini sa paglipay gumikan sa dakung gugma sa Dios alang sa iyang katawhan diin panahon kini sa pagdayeg ug pagpasalamat sa gasa sa Diosnong gugma ug kaluwasan.

Samtang si Yolly Rapana, sakop sa Catholic Faith Defender ug sa Pagsangyaw Team sa Archdiocese of Cebu, nitug-an nga ang kwaresma panahon usab kni sa paghinulsol sa mga sala ug mobalik sa Ginoo pinaagi sa pagduol sa mga sakramento sa kompisal.

Gitug-an ni Rapana nga angay ang katawhan mohimo og mga pagpamalandong panahon sa kwaresma ug panahon kini usab sa pag-ampo, pagsakripisyo ug paghimo sa mga buhat sa kalooy. /GMR (BANAT NEWS)