P100T pa nadawat sa Alegria sa drilling

CEBU, Philippines — Sukad sa pagbukas sa oil drilling project sa Lungsod sa Alegria niadtong 2018, gipanglantawan nga molambo pa ang lungsod tungod sa gahin nga makuha niini gikan sa kita sa maong proyekto.

Apan nasayran ni Gobernador Gwendolyn Garcia nga sukad sa pagsugod sa proyekto, ang Alegria nakakuha pa lang og P100,000 nga bahin.

Ang oil exploration ug drilling gihimo sa Barangay Montpeller sa lungsod diin ang kontraktor mao ang China International Mining Petroleum Ltd. Co. (CIMP) nga subsidiary sa Polyard Petroleum International Group Limited.  Si Garcia nakigtagbo sa mga opisyal sa maong kompaniya diin adunay siyay gipangutana kalabot sa computation sa revenue sharing.

Apan ang gobernador naglibog sa tubag sa mga representante hinungdan nga adunay laing tigum nga himoon aron makahatag og mas detalyado nga datus ang CIMP.

Ubos sa Presidential Decree No. 87 o ang Oil Exploration and Development Act of 1971, 60 porsyento nga gahin gikan sa kita sa proyekto maadto sa gobiyerno sa Pilipinas.

Sa 60 porsyento, bahinon kini sa national, probinsiya, lungsod ug barangay.

“They (DOE) estimated nga ang share sa Alegria for 2018 and 2019, somewhere between P500,000 to P600,000 and yet ang nadawat sa Municipality of Alegria so far has only been P100,000 plus and yet under the Local Government Code, when we talk about share of the national wealth, that should be remitted directly on the first five days every quarter,” matud ni Garcia. Ang gobernador nanghinaut nga ang Department of Energy motan-aw sa posibilidad mga ideretso og remit sa Alegria ang bahin niini gikan sa maong proyekto aron magamit sa lungsod sa mga programa ug proyekto niini. – Le Phyllis F. Antojado/GMR

Minus nagparehistro sa Comelec atol sa holiday

Padayong nanawagan ang Commission on Elections sa mga buot magparehistro nga mobisita sa ilang buhatan bisan adlaw nga Sabado ug mga holidays kay bukas man sila gikan sa alas 8 sa buntag hangtud alas 5 sa hapon.

Matud ni Omar Sharif Mamalinta, election assistant sa Comelec- Cebu City 1st District, nga atol sa duha ka adlaw nga holidays sa Dakbayan sa Sugbo, gamay lang ang nagparehistro.

Ang pagpangrehistro naglakip sa bag-o nga mobotar, mobalhin og residensya, reactivation of voters registration, correction of records, reinstatement subay sa mando sa korte ug uban pa may kalabutan sa rehistrasyon.

Hinoon dili bukas ang buhatan sa Comelec sa Abril 9, 10 ug Disyembre 2, 2020 lakip usab ang April 1 ug 2, 2021. Ang voters registration matapos sa Septiyembre 30, 2021 apan awhag ni Mamalinta nga dili paaboton nga magdasok ang mga tawo una magparehistro. Ang kwalipikado nga magparehistro kadto lang mga residente sa barangay sulod na sa unom ka buwan ug 18-anyos pataas sa dili pa o sa adlaw sa Mayo 11, 2022 nga eleksyon. /GMR (BANATNEWS)