Pagminus sa mga turistang langyaw nabatyagan sa norte
CEBU, Philippines — Gibutyag sa mga magpapatigayon sa northern Cebu nga nakibhangan gyud og 40 porsyento ang mga bisita nilang langyaw tungod sa Coronavirus Disease 2019.
Matud ni Antonio Ynoc, tag-iya sa San Remigio Beach Club, nga daku kaayo og epekto ang CoViD-19 sa mga magpapatigayon kay niminus gyud ang mga bisita nga langyaw.
Hinoon nakauyon ra sab sila nga pugngan ang bisan unsa nga sakit nga makasulod sa nasud.
Dugang ni Ynoc nga dawaton nalang gyud ang resulta sa mga negosyo tungod sa CoVid-19 diin nakaapektar sa ilang mga kita.
Gibutyag ni Ynoc nga tungod sa pagminus sa ilang mga guests nga langyaw aduna silay mga packages para sa mga lokal nga turista sama sa grupo para sa team building ug mga kasal.
Si Ynoc nitug-an nga niining panahon nga minus ang mga guests nga langyaw angay usab ipang-upgrade ang mga balay-patigayon aron kung mobalik ang pagdagsa sa mga langyaw nindot na ang mga pasilidad.
Giawhag ni Ynoc kadtong nangita og kalaagan o kasuroyan nga mobisita lang sa mga resort sa northern Cebu kay nindot naman ang kadalanan ug lugar mga kabisitahan. /GMR (BANATNEWS)
- Latest
