Larsian ipaugmad sa pribadong kompaniya

CEBU, Philippines — Nangita na karon ang Kapitolyo og kompaniya nga interesado mo-develop sa duha ka prime properties sa Dakbayan sa Sugbo.

Ang Economic Enterprise Council sa Kapitolyo nipagawas og "notice of invitation to submit proposals" alang sa pag-develop sa luna diin gitukod ang Larsianug ang luna atbang sa Cebu IT Park.

Ang 3,173 ka metro kwadrado nga luna sa B. Rodriguez Street ug Don Mariano Cui St. sa Baranggay Capitol Site ug ang 4,450 metro kwadrado nga luna sa may Salinas Drive sa Barangay Lahug maoy plano nga i-develop sa Kapitolyo pinaagi sa Build-Transfer-Operate scheme.

Ang kompaniya maoy motukod sa building sa luna sa probinsiya apil na ang pag-operate ug human sa pipila ka tuig itugyan na kini ngadto sa Kapitolyo.

Si Gob. Gwendolyn Garcia una nang nagkanayon nga gusto niya ipa-develop ang property sa Kapitolyo ug depende sa interesadong kontraktor kun unsay itukod o ipadayon ba ang Larsian o magtukod og lain. Ang Kapitolyo nitakda sa mga interesado nga kompaniya nga mosumiter sa ilang requirements sa Kapitolyo sa Marso 6.

Kini naglakip sa letter of intent, corporate profile, financial statement sulod sa tulo ka tuig ug uban pa. /GMR (BANATNEWS)