Clean-up sa Butuanon River i-postpone

CEBU, Philippines – Gikonsiderar sa Environmental Management Bureau sa Department of Environment and Natural Resources 7 ang pag-oktaba sa coastal clean-up sa Butuanon River sa Siyudad sa Mandaue.

Kini human nasuta sa Department of Health nga positibo sa poliovirus ang ilang nakuha nga water sample gikan sa maong sapa.

Matud ni Kay Espinoza, Environmental Management Specialist II sa Ambient Section sa EMB-7, nga ila pa hinoon gipaabot ang kamanduan gikan sa ilang labaw tungod sa risgo sa panglawas ilabi na sa mga volunteers.

Ang DENR-7 dunay regular nga coastal clean-up matag quarter ubos sa ilang Rivers for Life Program alang sa pag-rehabilitate sa ma sapa.

Lakip sa mga sapa nga benepisyaryo sa programa ang Luyang River sa Lungsod sa Carmen, Bulacao River sa Dakbayan sa Sugbo ug Butuanon River sa Siyudad sa Mandaue ingon man ang sapa sa Manaba, Abatan ug Inabanga sa Lalawigan sa Bohol; Banica, Sicopong ug Panam-angan River sa Negros Oriental ug Señora River sa Siquijor.

Si Mandaue City Mayor Jonas Cortes niluwat og kamanduan sa pagdili sa publiko nga makaduol sa sapa sa Butuanon, Mahiga ug Tipolo Creek.

Gihingusgan karon sa dakbayan ang ilang polio vaccination sa kabataan nga edad 4-anyos paubos.

Matud ni City Health Officer, Dr. Rosemarie Ouano-Terado, gisubay ang 27 ka barangay sa dakbayan alang sa pagpangita niadtong mga bata nga wala pa nabakunahi sa tulo ka hugna nga vaccination.

Ang DOH-7 naghatag lang kanila og pito ka adlaw sa pagpahigayon og vaccination batok sa polio.

Samtang gi-monitor ang mga barangay sa Dakbayan sa Lapu-Lapu nga nag-atubang sa Mactan Channel nga maoy awasanan sa Butuanon River ug ubang sapa.

Si Lapu-Lapu City Mayor Junard “Ahong” Chan niila sa mga barangay nga mao ang Mactan, Ibo, Buaya, Pusok, Poblacion, Looc ug Pajo.

Matud ni Chan nga ang DOH-7 ug City Health Office ang nagsugod na sa house-to-house survey alang sa pag-edukar sa mga molupyo labot sa poliovirus.

Hinuon gitataw ni Dr. Agnes Cecil Realiza, pangulo sa CHD, nga sa kasamtangan negatibo pa ang dakbayan sa kaso sa poliovirus contamination.

Buot ni Chan nga makabutang og mga communal toilets sa kabarangayan aron dili sa dagat maglabay sa hugaw ang mga tawo. Romeo T. Limpangog/GMR (BANAT NEWS)