Samsam di modupa sa madakpan nga opisyal

CEBU, Philippines – Padayon ang suporta ni Talisay City Mayor Gerald Anthony “Samsam” Gullas Jr. ngadto sa kapolisan sa siyudad.

Kini bisan sa pagkadakop sa usa ka Sangguniang Kabataan chairwoman sa Barangay Lawaan 3 ug sa iyang amahan niadtong Miyerkules sa kaadlawon.

Nalakip sa pagkasikop si Guendolyn Luage, 22, ug iyang amahan nga kanhi barangay tanod nga si Francisco Luage atol sa pagsilbi sa search warrant ug buy-bust operation sa ilang lugar diin 12 ka tawo ang nasikop.

Nakalitan ug wala katuo si Gullas dihang nadawat niya ang impormasyon ilabi na nga usa ka opisyal sa barangay ang nalakip sa pagkasikop may kalabutan sa ilegal nga drugas.

Matud niya nga si Police Major Gerard Ace Pelare, hepe sa Talisay City Police Station, nitug-an kaniya nga ilang ipadayon ang pagpasaka og kaso batok sa mga dinakpan karong semanaha.

Si Pelare nagkanayon nga ang pamilyang Luage nagpadayon sa ilang negosyo sa drugas bisan pa man sa pagkapatay sa maguwang ni Guendolyn nga si Girlie sa gihimo nga drug operation sa Barangay Mambaling, Siyudad sa Sugbo.

Si Gullas niingon nga naghatag og mensahe ang hitabo sa Barangay Lawaan 3 nga wala pa mahuman ang subsob nga paggukod sa mga tawo nga nalambigit sa ginadiling drugas.

“It’s a police issue and I promised the police I will not interfere in any investigation,” matud ni Gullas.

Gawas sa pagkasikop sa grupong Luage patay sab ang ilang kauban sa negosyo nga si Gilbert Campo human nisukol sa operatiba. /GMR (BANAT NEWS)