Gilugos sa langyaw sud sa hotel

CEBU, Philippines – Usa ka babaye ang midangop sa Parian Police Station ug gireklamo ang usa ka Swede og pagpanglugos diha sa giabangan niining lawak sa usa ka hotel  diha sa dalan Echavez, Barangay Lorega San Miguel ning Dakbayan sa Sugbo.

Matud ni Police Major Armando Labora ang gireklamo mao ang usa ka Joseph Daniel Arian, 25, nga nakaila niini diha sab sa hotel diin sila parehong ni-check-in.

Hubog matud pa ang duha nga nag-abot pagbalik sa hotel ug sa dihang nisulod na ang biktima sa iyang lawak kalit kining gitukmod sa suspek pasud.

Nagtuo ang biktima nga gisundan siya sa suspek paingon sa iyang lawak ug didto gimolestiya siya niini ug pagkahuman gilugos.

Human sa krimen misibat ang suspek apan sa pagresponde sa mga polis ug giadto iyang lawak didto nakita-n ang iyang passport hinungdan na kini nailhan.

Kasong rape ang ipasaka batok kang Arian karong adlawa.

Sa laing hitabo, usa ka Ariel Cuyos, nga usa ka construction worker ang gidakop sa Cebu City Police Office City Mobile Force Company tungod sa kasong pagpanglugos.

Ang suspetsado taga Barangay Maya lungsod sa Daanbantayan  giadto sa kapolisan ug gidakop pinasikad sa warrant of arrest nga gipagawas ni Judge Marlon Moneva sa Regional Trial Court (RTC) Branch 20 sa Dakbayan sa Sugbo. Matud pa nga nahitabo ang pagpanglugos niadtong tuig 2017 sa Barangay Talamban Dakbayan sa Sugbo ug 15 anyos ang biktima.

Ang suspek mihimakak  sa pasangil kay matud niya gigakos lang niini ang biktima kay naalaan niyang mao ang iyang uyab. /IBM (BANAT NEWS)