Buybust usa patay

CEBU, Philippines – Patay ang usa ka giisip nga High Value Individual (HVI) sa kampanya kontra ilegal nga drugas human nisukol sa mga sakop sa Provincial Intelligence Branch (PIB) sa Cebu Provincial Police Office (CPPO) diha sa Sitio Blissed, Barangay Lawaan 3, Dakbayan sa Talisay kagahapon sa kaadlawon.

Ang namatay nailhan nga sj JC Dacuma Caballero alyas Jessie, 27, nagpuyo sa maong dapit. Si Lt. Col. Marlu Conag, pangu sa PIB nagkanayon nga bisan tuod idlas ang suspek apan naabtan gyud siya sa balaod ilabi na nga gipamusil niini ang mga operatiba hinungdan nga kini nabawsan ug napatay.

Nakarekuber og usa ka gamay nga sachet ug usa ka medium nga pakete sa shabu; duha ka armas ug mga bala ug sudlanan sa drugas.

Matud ni Conag, bisan paryente sa suspek nangreklamo kanila kay hasta mga pagumangkon nilang menor de edad sugoon niini paghatod sa ilegal nga drugas ngadto sa mga pumapalit.

Samtang lima sab ang nadakpan sa Lapu-Lapu City Police Office sa operasyon batok sa ilegal nga drugas nga mao sila si William  Sanchez  Yaon; Andrea Tallo  Armenteros, 19;  Jimmy Bandolon  Casipong; Jessie  Tumangan  Peñaranda, 45;  ug Archie   Cabanca  Amorgoso,  33.

P10 milyones drugas

Sa pikas bahin, dul-an sa P10 milyones na nga balor sa ginadili nga drugas ang nasakmit sa Philippine Drug Enforcement Agency 7 sulod lang ning nakalabay nga duha ka bulan. Gitug-an ni Leia Albiar-Alcantara, tigpamaba sa PDEA7 nga nahinabi sa mga tigbalita nga gikan Enero ngadto sa Pebrero miabot 1,400 gramos nga shabu ang ilang nasakmit ug 82 ka mga High Value Targets ug 11 ka High Impact Operations ang ilang nahimo ug walo ka mga drug dens ang ilang nabungkag.

Sumala pa ni Alcantara, nakalarot usab sila og dul-an sa P30 milyonses nga balor sa marijuana.

Balay silangan

Sa kalambigit nga balita, karong adlawa buksan ang Balay Silangan sa Lungsod sa Balamban nga usa ka rehab center.

Apan sukwahi sa kasagarang drug rehab nga drug users ang pasyente, ang ilaha para sa small time drug pushers nga motahan ug kadtong mga ni-avail sa plea bargaining agreement sa korte.

“We have observed gyud, this is a reality kun plea bargain wala sila’y padulngan adto ra sa barangay murag in the open. Mahitabo gyud madakpan namo og balik kay wala man sila’y nahibaw-an but ang pagpamaligya.

So, the Balay Silangan is actually a facility where you can develop your skills kay naa man mi mga training didto, depende kung unsay ilang inclination nga ini’g- gawas nila naa sila’y skills nga di na sila mobalik didto(drugas),” asoy ni Alcantara. Rowena Capistrano, Rome Limpangog ug Decemay P. Padilla/IBM (BANAT NEWS)