Bernadas: DOH ray tuohi bahin sa COVID19

CEBU, Philippines – Ang Department of Health Central Visayas miawhag sa publiko nga dili mopakatap og mga dili beripikadong mga impormasyon kabahin sa Coronavirus Disease 2019 (COVID19) diha sa social media.

Giklaro ni DOH-7 Regional Director Dr. Jaime Bernadas nga ang ilang buhatan lang maoy angay tuohan sa publiko ug dili kanang mga post sa social media.

“Ako lang ng lagi gihangyo nga kung wala man gani moy buhaton sa social media palihog didto moadto sa website sa DOH ug sa website sa Regional Office kay didto ta makakuha og verified information.

Unya labi ng makakita tag mga i-upload lang sa atong social media dili tungod kay gi-upload na siya tinuod na siya, daghan pud ang ma-upload nganha nga unverified so dili gyud ta angay motuo dayon niana kung gusto mo verifiable information moadto lagi ta sa website sa DOH tanan didto among gisulat wala’y tsismis, verified ug base on facts,” asoy ni Bernadas.

Giklaro ni Bernadas nga wa pay nagpositibo sa maong sakit dinhi sa Sugbo ug wala say namatay sa mga gi-obserbahang natakboyan og coronavirus.

Pagkakaron, dunay 27 ka Persons Under Investigation (PUI) nga gimonitor sa mga tambalanan samtang 151 ang mga Persons Under Monitoring (PUM) nga anaa sa mga pasilidad ug nag-home quarantine sa Central Visayas. /IBM (BANAT NEWS)