Suroy-Suroy sa Sugbo padayon bisan sa nCoV

CEBU, Philippines — Madayon gihapon ang Suroy-Suroy sa Sugbo ngadto sa isla sa Camotes sa bulan sa Abril bisan pa man sa hulga 2019 Novel Coronavirus- Acute Respiratory Disease (NCoV-ARD).  Masaligon si Gobernador Gwendolyn Garcia nga bisan pa nga adunay mga langyaw nga mokuyog sa Suroy-suroy Sugbo, andam ang probinsya aron malikayan nga mokatap ang maong sakit.

“Of course we will put in place all precautionary measures in order to ensure the safety of our tourists,” matud ni Garcia atol ni sa tigum uban sa mga mayor sa mga lungsod ug  mga dakbayan alang sa pagpangandam ug paglikay nga makasulod ang maong sakit sa Sugbo.

Ang “Suroy-Suroy Sugbo Enchanting Camotes” ipahigayon kini sa Abril 25 ug 26 diin suroyon sa mga delegado ang upat ka mga lungsod sa maong isla, ang Poro, San Francisco, Pilar ug Tudela.

Atol usab sa maong tigom, pipila ka mga local government unit ang nipahibalo nga ila usab isuspenso ang ilang pampubliko nga kalihokan sama sa fiesta, bayle ug anniversary aron malikayan ang pagtakatap sa maong sakit.

“Kun ugaling dunay ma-home quarantine nga OFW (overseas Filipino worker) sa inyohang barangay, tabang intawon mo og monitor. Magtinabangay ta ani sama sa atong gibuhat sa pakigbatok sa ASF (African swine fever) aron dili ni mokatap,”  matud ni Garcia  sa report sa Sugbo News atol sa pagpangapud-apod sa cash incentives sa kapin us aka libo ka mga tanod sa Medellin, San Remigio, Daanbantayan, Tabuelan, ug Tabogon. /IBM (BANATNEWS)