Pista Senyor sa Mohon malampuson

CEBU, Philippines — Gatusan ka mga sakayan nga pandagat ang niapil sa fluvial procession sa kadagatan sa Barangay Pooc, subay sa kapistahan sa Balaan nga Bata Senior Santo Niño sa Mohon Talisay nga gipangulohan sa kura paruko Fr. Jonas Mejares, uban sa mga opisyal sa Dakbayan sa Talisay nga gipangulohan ni Mayor Gerald Anthony "Samsam" Gullas.

Bisan sa bunok sa ulan o ang hulga sa novel coronavirus wala kini nakapatarug sa mga tawo nga niapil sa fluvial procession ug lakip usab sa mga tawo nga diha lang sa baybayon nagpaabot.

Ang maong fluvial procession gisugdan kini sa kadagatan sa Pooc ug nipatighug kini ngadto sa Dumlog, Poblacion, Tangke, Fish Port dayon balik ngadto sa Pooc.

Mapasalamaton si Mejares sa tanang mga nitambong ug nisalmot sa mga kalihukan gikan sa pagsugod sa nobenaryo hangtod na sa fluvial ug solemn foot procession.

Sumala pa ni Mejares, matag tuig nagkadaghan ang tawo nga moapil sa maong kalihukan ug bisan sa bunok ug hadla sa ulan wala kini nakapahuyang sa mga tawo sa  pagapil.

Samtang si Gullas, mapasalamaton sa tanan mga niapil sa kalihukan, diin iyang nakita nga nagkadaghan matag tuig. Gihangop usab sa mayor nga nahimo siyang kabahin sa maong selebrasyon. /IBM (BANATNEWS)