P300 mil nga mga alahas nadala sa kawatan

CEBU, Philippines — Sobra sa P300 mil ang kantidad sa mga alahas nga nasakiyo sa wala ilhing mga kawatan kinsa nilungkab sa usa ka panimalay diha sa Camella Homes sa Barangay Lawaan 1, Dakbayan sa Talisay niadtong niaging adlaw.

Ang biktima giila sa mga polis nga si Algerica Omayao, 42-anyos, minyo, residente sa nahisgutang lugar.

Base sa imbestigasyon sa kapolisan nasuta nga nibiya sa ilang balay ang biktima tungod kay niadto kini sa tunghaan sa iyang anak.

Ug sa pag-uli ni Omayao ug sa iyang anak gikan sa eskwelahan nabantayan sa biktima nga abli na ang ilang pultahan.

Sa pagsulod sa biktima ug sa iyang anak nagkatag na ang ilang mga butang hangtud sa ilang kwarto.

Nabantayan usab sa biktima nga aduna nay buslot ang kilid sa door knob sa pultahan sa ilang kwarto diin giingong gibangagan kini sa mga kawatan aron makasulod sa kwarto.

Nabantayan sa biktima nga nawala na ang ilang mga alahas nga gibanabanang nikantidad tanan ngadto sa P325,322.

Ang kapolisan nipahigayon kini og follow up nga imbestigasyon sa maong hitabo pag-ila sa mga kawatan. /BDB (BANATNEWS)