Chinese consul, Gwen nagtagbo

CEBU, Philippines – Nakigtagbo si Gob. Gwendolyn Garcia ug Chinese Consul General Jia Li aron pagtuki sa lakang batok 2019 novel coronavirus.

Matud ni Garcia nga iyang gipahibawo kang Li nga aduna siyay luwatan nga executive order nga makaapektar sa pagsulod sa mga Chinese sa Sugbo.

Gipasalig sa gobernador nga dili makaapekto sa relasyon sa Sugbo ug China ang himoon niyang lakang.

Karong adlawa gikatakda nga tigumon ni Garcia ang tanang concerned agencies ug grupo gikan sa Department of Health, Mactan Cebu International Airport, mga airline operators ilabi na kadtong mga biyahe sa China, Cebu Port Authority, Department of Foreign Affairs, Department of Tourism ug uban alang sa multi-sectoral effort pagseguro nga dili moabot sa Sugbo ang makamatay nga sakit nga 2019-nCoV.

Ang konseho sa Siyudad sa Sugbo nagdeklarar og “state of preparedness” sa tibuok siyudad nunot sa hulga sa 2019-nCoV.

Kini aron pagpatuman sa “city-wide prevention mechanism” ug mga lakang sa pagpangandam.

Ang maong deklarasyon nagpasabot nga ang siyudad ang mangulo sa pagpatubag sa mga panginahanglan sa tanang sektor alang sa pagpatuman og mga tukmam nga lakang sa pagpangandam.

Ang mga eskwelahan, malls, pribado ug publiko nga mga opisina, simbahan, pantalan, terminal, tri-media, hospital, ug mga health centers kinahanglan sab nga mosagop og mga precautionary measures ug magbaton og husto nga kasayuran bahin sa 2019-nCoV. Gani nagpagawas og regional memorandum ang Department of Education alang sa prevention sa 2019-nCoV. Matud ni DepEd-7 Director, Dr. Salustiano Jimenez, nga sa maong memorandum ilang gisubli ang angayan buhaton sa mga eskwelahan aron ang kabataan dili mahadlok ug ang mga ginikanan kampante ug kun dunay matan-aw nga sintomas sa virus ipadangat dayon kini sa hingtungdang buhatan.

Giawhag sab nila ang mga tunghaan nga moumol og task force aron kun dunay mahibaw-an nga naay gipang-ubo ug gipanghilantan ipa-check up dayon ug ipahibawo sa district ug division office dayun sa regional office.

Ang Archdiocese of Cebu mopagawas sab og Oratio Imperata nga pag-ampo alang sa mga kabalaka sa mga tawo may kalabutan sa bag-ong sakit. Sumala pa usab ni Cebu Archbishop Jose Palma nga atol sa tigum nila sa Catholic Bishop Conference of the Philippines nauyonan sa kadaghanan diin inay ang paghatag sa kalawat pinaagi sa baba mas maayo nalang ibutang sa kamot. Samtang wala pa makapagawas ang CBCP, matud ni Palma nga ang Archdiocese of Cebu mopagawas og Oratio Imperata nga ampoon sa tanang mga misa sa simbahan.Mary Ruth R. Malinao, Decemay P. Padilla, Rowena D. Capistrano/GMR (BANAT NEWS)