Pagkasunog sa trak ni Frasco aksidente

CEBU, Philippines — Aksidente ang pagkasunog sa gidonar nga trak ni Kongresista Vincent Franco “Duke” Frasco sa Isla sa Camotes sumala sa pakisusi sa Bureau of Fire Protection.

Matud sa report nga ang sunog nagsugod sa “electrical ignition caused by loose connection” sukwahi sa pasangil ni Frasco nga tinuyo ug may kalambigitan sa politika ang pagkasunog sa Mitsubishi Canter dump truck.

Namatikdan sa kabomberohan nga ang tuo nga habig sa atubangan sa sakyanan ug ang ligid niini ang nakan-an sa kayo.

Nakit-an sab nga ang cable wire sa battery natangtang na sa wala pa naabot ang taga bombero.

Walay nakakita sa pagsugod sa kayo ug giingong nakamata nalang ang mga tawo nga dunay nibuto ug pagtan-aw nagsiga na ang kayo sa sakyanan.

“Based on the investigation by the investigators of this station, the fire originated at the wirings of the alternator of the vehicle causing the damage. The fire spread upward and sideward causing the right side of the tire to explode and partially damage the front passenger side of the vehicle,” matud sa report sa San Francisco Fire Station.

“Therefore, investigators concluded that the possible cause of fire is electrical ignition caused by loose connection and is considered accidental,” dugang sa maong report.

Niadtong Enero 17 si Frasco nipakita sa hulagway sa nasunog nga sakyanan sa iyang Facebook.

Ang sakyanan nahimutang sa Barangay Unidos, San Francisco sa Isla sa Camotes dihang nasunog.

“The harassment, intimidation, violence, and destruction inflicted upon the people of the 5th District has gone on for decades. Now that I have become the Congressman of the District, the people are being punished for exercising their right to choose change, and to have hope,” matud sa post ni Frasco.

Sa wala pa napili si Frasco sa niaging eleksyon, ang ikalimang distrito sa Lalawigan sa Sugbo gidominar sa pamilyang Durano sulod na sa 70 ka tuig.

Gipilde ni Frasco ang naglingkod nga kongresista nga si Ramon “Red” Durano IV.

Gihimakak sa Barug Alang sa Kauswagan ug Demokrasya (BAKUD) Party nga gipangulohan sa mga Durano ang pasangil ni Frasco.

“He has gone to the extent of burning (not literal, hopefully) bridges just to be able to cry persecution when, the people of the district know very well, that the ‘persecuted’ is allegedly the saboteur himself,” matud sa pamahayag sa partido. Gikan sa The Freeman/GMR