Chinese tourist dili i-ban sa Cebu City
CEBU, Philippines — Ang Cebu City Public Information Office mipagawas og pamahayag nga nagklaro ug nihimakak sa mga nanggawas nga balita nga si Cebu City Mayor Edgardo Labella giingong miisyu og pamahayag nga i-ban niini pagsulod sa siyudad ang mga Chinese tourist tungod sa novel corona virus.
Ang maong pamahayag gi-post sa Facebook page sa Cebu City PIO aron pagklaro sa nanggawas nga “fake news” diha sa social media.
Matud pa nga sa press conference niadtong Biyernes, si Labella miingon nga angay gyud mabalaka ang si bisan kinsa tungod niining sakita ug kinahanglang dunay himuon aron mapugngan kini.
Ang novel corona virus mipatay na og kapin 40 ka tawo ug nakatakboy og liboan ka tawo sa Wuhan City sa China ug sa mga kasikbit niining mga probinsya didto, duna nasay mga kaso sa ubang mga nasud.
“Who should not be concerned? We should all be concerned. And while we are concerned, we have to do something, we have to take steps to prevent this disease from affecting our people in the City of Cebu, “ matud pa sa mayor nga tipik sa pamahayag sa PIO.
Giklaro sa PIO nga wala gyud moingon ang mayor nga i-ban niini ang mga Chinese tourist ug wala sab kini naghisgot nga plano niya kining himuon.
Ang giingon sa mayor, gimandoan na si Dr. Daisy Villa, hepe sa City Health Department nga mag-deploy og health personnel sa Mactan-Cebu International Airport aron tabangan ang Bureau of Quarantine ug Department of Health pag-monitor sa maong sakit gikan sa mga pasaherong mangabot.
Giawhag sab ni Labella ang opisyales sa 80 ka barangay nga monitoron ilang mga konstituwente kun wa bay nasakit nga susama og sintomas sa maong sakit.
Ang PIO miawhag sa publiko nga di dayon motuo ug siguraduhon kun unsa ilang mabasahan diha sa mga social media. IBM (BANATNEWS)
- Latest
