Cabillan: Kaisog ug sakripisyo sa SAF 44 himuong sumbanan

CEBU, Philippines — Himuon nga sumbanan sa kapolisan sa Police Regional Office (PRO)-7 ang pagkabayanihon sa mga polis kinsa andam ug tagana nga isakripisyo ang ilang kinabuhi alang sa kahapsay ug kalinaw sa nasud.

Kini maoy mensahe ni PRO-7 Deputy Regional Director for Administration Police Brigadier General Domingo Cabillan subay sa ikalima ka tuig nga anibersaryo sa pagkakalas sa 44 ka polis nga mga sakop sa Special Action Force (SAF) sa nahitabong engkwentro kaniadto tali sa Moro Islamic Liberation Front (MILF) ngadto sa Mamasapano, Maguindanao.

Matud ni Cabillan nga ang gihimo nga sakripisyo sa 44 ka polis nagpakita kini sa ilang kaisog nga angay sundon sa kapolisan nga andam ug tagana usab nga isakripisyo ang ilang kinabuhi alang sa nasud.

Atol sa gipahigayon nga misa nitambong niini ang tulo ka pamilya sa mga sakop sa SAF 44 diin ang kapolisan sa PRO-7 nihalad usab kini og mga buwak.

Adunay mga hulagway sa 44 ka polis nga nakalas ang gipangbutang diha sa mga police station sa Centra Visayas isip pagtimaan sa ilang bayanihong buhat.

Subay niini, gipahimangnoan usab ni Cabillan ang mga polis nga kanunay nga magbinantayon ug dili basta-basta nga mokompiyansa ilabi na sa mga polis nga anaa sa mga bukirang lugar nadestino. /BDB (BANATNEWS)